Aryzdanýshylardyń aıtýynsha, azyq-túlikti orynsyz únemdeý saldarynan balalar ash júredi eken.
Balabaqsha qalanyń Qursaı móltekaýdanynda ornalasqan. Jergilikti turǵyndar mektep deıingi bilim berý mekemesiniń qyzmetkerlerge jáne balalarǵa degen qarym-qatynasyna narazylyqtaryn bildirdi.
Balabaqsha tárbıeshileri balalardyń toıyp tamaq ishpegennen jıi ash júretinin rastap otyr. Sonymen qatar olar bastyqtyń qorlaýyna jáne uryp-soǵýyna shydaıtyn kezderi bolatynyn da basa aıtty.
«Men as úıden tamaq taratamyn. Keıde taǵamdy qalaı daıyndap jatqanyn kórip qalamyn. 150 balaǵa taýyqtyń 2 jambasynan tamaq jasaıdy. Sóıtip birinshi asqa − sorpa, ekinshi asqa − sýǵa pisken kúrish nemese jarmany buqtyryp janyna sol taýyq etin salyp beredi. Qyzmetkerler de osy tamaqty jeımiz. Bul úsh jyldan astam ýaqyt boıy jalǵasyp keledi», dedi Shymkent qalasynyń №36 balabaqsha tárbıeshisiniń kómekshisi Ásııa Dalıeva.
Al Qursaı móltekaýdanynyń turǵyny Qalıma Qazybaeva: «Qazir meniń eki balam osy balabaqshaǵa barady. Bireýi − 5, ekinshisi − 2 jasta. Olar úıge ash keledi. Keıde tipti erterek alyp ketemiz. Qaıtar jolda qarny ash ekenin aıtyp jylaıdy. Biz dúkenge kirip, nan satyp alsaq, úıge jetkenshe jep qoıady», deıdi
Balabaqsha qyzmetkerleri balalar ash qalmaýy úshin úıden tamaq alyp keletin kezderi bolatynyn aıtty. Olardyń aıtýynsha, basshysy dóreki sóılesedi, keıde tipti qol kóteredi. Shydamaǵandary jumystan shyǵyp ketken.
Tárbıeshi Shárbat Saýlyqova keshegi ótken jınalysta ol úsh qyzmetkerge ǵaıbat sóz aıtyp, artynsha ornynan turyp Juldyz esimdi qyzdyń qolynan qalyń dáptermen salyp qalǵanyn aıtty. Mundaı jaǵdaılar jıi-jıi qaıtalanyp turatyn da tilge tıek etti.
Mekeme basshysy bolsa, ózine taǵylǵan aıypty joqqa shyǵarady. Jumystan shyǵarý úshin bári oǵan qarsy birigip alyp, ádeıi jasap otyrǵanyn aıtady.
«Kesheden bastap telefonyma túrli habarlama kelip jatyr. Eger men olarǵa belgili bir somany bersem, onda ata-analar da, qyzmetkerler de búlik shyǵarmaıdy dep jazypty. Bolmasa, bárin osynda jınaımyz dep qorqytty. Basqa aıtatyn eshteńem joq. Bul týraly quqyq qorǵaý organdaryna habarlaımyn», dedi balabaqsha meńgerýshisi Zına Moldaqulova.
Janjal kezinde bilim basqarmasynyń qyzmetkerleri de keldi. Narazy toptyń shaǵymdaryn tyńdap, bul máseleni sheshýge ýáde berdi. Osyǵan oraı arnaıy komıssııa qurylatynyn jáne basshylyq áreketin polısııa da tekseretin aıtyp ótti.
Al ata-analardyń kópshiligi dırektordy jumystan shyǵarmaıynsha, balalaryn ákelmeımiz dep otyr.
