Oblys ákiminiń birinshi orynbasary Nurjaýǵan Qalaýov óńirdegi epıdemıologııalyq jaǵdaıdyń turaqty ekenin jetkizdi. Onyń sózinshe 6 qazannan bastap «Jaısań» jáne «Álimbet» kólik beketteri, áýe qatynasy arqyly 65 myńnan astam adam kelip, olardyń 5892-sinde PTR testiniń nátıjesi bolmaı, karantındik stasıonarlaǵa jatqyzylǵan. 47 adamnan koronavırýs indeti anyqtalǵan.
KVI-diń bolýy múmkin ekinshi tolqynyna daıyndalý maqsatynda óńirde barlyq sharalar qabyldandy. Qajet bolǵan jaǵdaıda kereýet orny 445-ten 3603-ke deıin artatyn bolady, 2895 oryn nemese 80,3%-y ottegimen qamtylǵan. Medısınalyq mekemelerde 21 stasıonarlyq rentgen apparaty ornatylyp, ókpeni jasandy jeldetetin 367 apparat, 582 ottegi konsentraty, 626 ottegi ballondary, 787 Bobrov apparaty men 461 ottegi jastyqtary bar. Jedel járdem beketi men emdeý mekemeleriniń avtoparki 41 sanıtarlyq mashınamen tolyqty, 6 mobıldi dıagnostıkalyq keshen satyp alyndy, dárilik jáne jeke qorǵanys zattarynyń eki aılyq kesheni jasaqtaldy.
Búginde 47 baqylaý toby 29200 nysandy qamtyp, 9195 reıd júrgizdi, 1842 adam ákimshilik jazaǵa tartylyp, 177,6 mln teńgege aıyppul salyndy.
«Bizdiń oblys «jasyl aımaqta» tur, biraq, óńirdegi turaqty jaǵdaıǵa qaramastan, koronavırýs ınfeksııasynyń kórshi oblystar men Reseı Federasııasynan kelý qaýpi bar. Onyń ústine bizdiń óńir arqyly «Batys Eýropa – Batys Qytaı» halyqaralyq kólik dálizi ótip jatyr. Covid-19 qaýpi áli seıilgen joq, sondyqtan arqany keńge salýǵa bolmaıdy. Koronavırýs ınfeksııasyna qarsy ekpege qatysty aqparattyq-túsindirý jumystaryn kúsheıtý qajet. Birinshi kezeńde bizdiń oblysta medısınalyq qyzmetkerlerdi, muǵalimderdi, kúshtik qurylym qyzmetkerlerin qosqanda turǵyndardyń aýrýǵa tez shaldyǵatyn tobyn, ıaǵnı jalpy alǵanda 150 myń adamdy qamtý josparlanyp otyr. Baqylaý toptary óz jumystaryn jalǵastyrýlary kerek», dep tapsyrdy oblys ákimi.
