«Sessııanyń ashylýynda Prezıdent Qasym-Jomart Toqaev memlekettik organdardyń aldynda turǵan negizgi maqsattarǵa toqtalyp ótti. Olardyń bári halyqtyń ómir súrý sapasyn jaqsartatyn, elimizdiń saıası jáne áleýmettik-ekonomıkalyq damýyna tyń serpin beretin bastamalar. Osyǵan baılanysty Parlament pen Úkimetke mańyzdy mindetter júktelip otyr. Jarııalanǵan reformalardy sapaly zańdarmen qamtamasyz etý – bizdiń basty mindetimiz. Zańdar eń aldymen ulttyq múddeni qorǵaýǵa tıis. Al ulttyq múdde degenimiz – halyq pen memlekettiń múddesi», dep toqtaldy M.Áshimbaev.
Osy tusta ol Prezıdent reformalaryn iske asyrý úshin Májilispen jáne Úkimetpen birlesip nátıjeli jumys isteletinin atap ótti.
«Memleket basshysy atap ótkendeı, qoǵamdy alańdatqan máseleler Parlamentte talqylanýy qajet. Parlament ózekti máselelerdiń sheshimin tabatyn ortalyqqa aınalýǵa tıis. Sondyqtan elmen etene jumys isteý – asa mańyzdy. Ár zań jobasyn talqylaǵan kezde qoǵamnyń pikirin eskerýimiz kerek. Senat jumysyna qoǵamdyq uıymdar men áleýmettik toptardyń ókilderin, tıisti mamandardy keńirek tartýymyz qajet. Mundaı qadam zań shyǵarý jumysynyń jáne qabyldanyp jatqan zańdardyń tıimdiligin arttyratyny sózsiz. Aldymyzda aýqymdy mindetter tur», dedi Máýlen Áshimbaev.
