Megapolıs ákimi Instagram-daǵy paraqshasynda telemedısına ortalyǵynda, otbasylyq-dárigerlik ambýlatorııada jáne MJÁ aıasynda ashylǵan ońaltý ortalyǵynda bolǵanyn habarlady.
«KVI-ge qarsy is-qımyldaǵy mańyzdy jumystyń biri – telemedısına ortalyǵyn qurý boldy. Jańadan qurylǵan biregeı ortalyqta boldym. Bul jer pandemııa kezinde qaýipti indetke shaldyqqan naýqastarǵa qashyqtan kómek kórsetedi», - dep jazdy B. Saǵyntaev.
Onyń aıtýynsha, arnaıy daıyndyqtan ótken 52 dáriger táýlik boıy aýdıo nemese beıne baılanys arqyly ambýlatorııalyq emde jatqan naýqastyń jaǵdaıyn baqylap, olarǵa keńes beredi. Búginde 816 adam úıde emdelýde. О́tken jyldyń 1 qarashasynan bastap úı karantınindegi 3,7 myń qala turǵynyna qashyqtan monıtorıng júrgizildi.
Sondaı-aq, Almaty ákimi B. Saǵyntaev qalalyqtarǵa alǵashqy medısınalyq-áleýmettik kómek kórsetý úshin tıisti barlyq jaǵdaılardyń jasalatynyn aıtty. Bul mindet jaqyn mańda emhanalar joq yqshamaýdandarda otbasylyq-dárigerlik ambýlatorııalardy ashý arqyly sheshilýde.
Máselen, Túrksib aýdanynda zamanaýı qurylǵylarmen jabdyqtalǵan «Altaı» ODA 11 myń adamǵa qyzmet kórsetedi. Sońǵy eki jylda mundaı 16 otbasylyq-dárigerlik ambýlatorııalar ashyldy. Bıyl taǵy tórteýin ashý josparlanýda.
Qala ákimi B. Saǵyntaev jeke kapıtaldyń qatysýymen qurylatyn ońaltý ortalyqtary júıesiniń ulǵaıǵanyn habarlady. MJÁ aıasynda ótken jyly «Arýana» kópsalaly ortalyǵy ashyldy. Ortalyq 50 tósek-orynǵa eseptelgen, sonyń ishinde ınsýlt, kardıologııa men travmatologııalyq naýqastardy emdeýge arnalǵan 41 oryn bar.
