Elastometrııa baýyrdyń zaqymdaný deńgeıin durys baǵalaýǵa jáne aýrýdy boljaýǵa, baýyrdyń sozylmaly dıffýzdyq aýrýlarynyń dınamıkasyn, ıaǵnı gepatıttiń órshýi men onyń sırrozǵa aýysýyn baqylaýǵa, baýyrdaǵy onkologııalyq oshaqty anyqtaýǵa, sonymen qatar shekteýleri bar baýyrdyń qajetsiz bıopsııasyn jasatpaýǵa múmkindik beredi. Al bıopsııa jasaǵan kezde baýyr parenhımasynyń tek azdaǵan bóligi zertteledi, fıbrotızasııa deńgeıi sýbektıvti túrde anyqtalady, pasıent úshin jaısyzdyqtar týyndaıdy, asqyný qaýipteri paıda bolady jáne qarsy kórsetkishteri bar.
Kardıologııa jáne ishki aýrýlar ǵylymı-zertteý ınstıtýtynyń fýnksıonaldyq, ýltradybystyq jáne sáýlelik dıagnostıka bólimshesiniń ÝDZ dárigeri Zýlfııa Rahımovanyń aıtýynsha, jańa ádis pasıent úshin óte jaıly, sebebi ol esh jaraqatsyz jáne qaýipsiz jasalady, zertteý júrgizýge onyń keri kórsetkishteri joq, balalarǵa qoldanylady, pasıentti aldyn ala tekserýdiń, daıyndaýdyń, stasıonarda jatýynyń qajeti joq. Ekonomıkalyq jaǵynan da bıopsııaǵa qaraǵanda arzan.
Zýlfııa Nııazovna aıtyp ótkendeı, tekserýge 10-15 mınýt ýaqyt ketedi, nátıjesi pasıentke tekserilgennen keıin birden beriledi, baýyrdyń fıbroskanırleýi pasıentke birneshe ret júrgizilýi múmkin, bul dıspanserlik baqylaý men terapııanyń tıimdiligin baqylaý kezinde mańyzdy.
DDU málimetteri boıynsha, adamdardyń 30%-y, ıaǵnı jer sharyndaǵy shamamen 2 mlrd adamda baýyrdyń sozylmaly dıffýzdyq aýrýlary bar. Olardyń ishinde V jáne S gepatıtteri dúnıe júzindegi ólim men múgedektilik sebepteriniń «ondyǵyna» kiredi.
Aýrýdyń boljamyn anyqtaý jáne oǵan naqty em taǵaıyndaý úshin baýyr fıbrozy, stenozyn (maılanyp zaqymdaný) der kezinde tabý jáne anyqtaýdyń mańyzy zor. О́kinishke oraı, baýyrdyń standartty emi (ALT, AST jáne ÝDZ zerthanalyq ádisteri) fıbrotıkalyq ózgeristerdiń dárejesine sáıkes kele bermeıdi. Tipti fıbrozdyń aıqyn kóriný dárejesinde de qalypty bıohımııalyq kórsetkishteriniń bolýy múmkin.
Búginde fıbroskanırleý ádisi «Fıbroskan» (soqyr ádis) apparatynda jáne zamanaýı sheshim retinde Hitachi Arietta apparattarynda jasalady.
Aldyńǵy qatarly saraptaý klasynyń Hitachi Arietta apparaty eń durys dıagnoz qoıý jáne gepato-kórinis alý úshin qajetti tekserip-zertteýdiń barlyq keshenin naqty júrgizýge múmkindik beredi. ÝDZ dárigeri zaqymdaný oshaǵyn ǵana emes, sonymen qatar onyń qurylymyn da naqty anyqtaıdy.
