Federasııa kýbogy – Astana boksshylarynda

Jeltoqsannyń 15-i kúni Astanada Qazaqstan Boks federasııasynyń kýbogy úshin Astana qalasy men Mańǵystaý oblysy quramalary arasynda fınaldyq kezdesý bolyp ótti. Onda elorda jasaǵy 6:4 esebimen jeńiske jetti.

Jeltoqsannyń 15-i kúni Astanada Qazaqstan Boks federasııasynyń kýbogy úshin Astana qalasy men Mańǵystaý oblysy quramalary arasynda fınaldyq kezdesý bolyp ótti. Onda elorda jasaǵy 6:4 esebimen jeńiske jetti.

Kezdesý bastan-aıaq tartysqa toly boldy. Ol sońǵy eki urys qalǵanǵa deıin eseptiń 4:4 bolyp turǵanynan da kórinedi. Al rıngke birinshi bolyp shyqqan 49 kılodaǵy Azat Qamzın (Astana) men Qýanyshbaı Sársenbaev (Mańǵystaý) arasyndaǵy aıqasta bulardyń birinshisi 3:0 (29:28, 29:28, 30:27) etip utty. Kelesi kezekte onyń jeńisin Ilııas Súleımenov (52 kg) jalǵastyrdy. Ol Nurjan Qoshanovty 3:0 (30:27, 30:27, 30:27) esebimen tize búktirdi. Al 56 kıloǵa deıingi Meıirbolat Toıytov bul esepti 3:0-ge deıin ósirdi. Onyń Qanat Kóptileýovpen shaıqasy da joǵarydaǵy esepti aına-qatesiz qaıtalady.

Osydan keıin ǵana munaıly túbektiń jampozdary óz sózderin aıta bildi. Atap aıtqanda, aldymen 60 kılodaǵy Berik Ábdirahmanov qarsylasy Darhan Jumsaqbaevty 3:0 (30:27, 30:27, 30:27) esebimen utsa, sosyn 64 kı­lodaǵy Jánibek Ájibaı vızavıi Dáý­let Dáý­kenovti dál osyndaı eseppen tize búktirdi.

Al 69 kıloǵa deıingi salmaqta astanalyq Meıirim Nursultanov mańǵystaýlyq Sýleıman Berdýkaevty ekinshi raýndta teh­nıkalyq nokaýtpen jeńdi. Kelesi sal­maqta (75 kg) mańǵystaýlyq Erik Áljanov osy nokaýttyń esesin qaıtardy. Ol Aslanbek Dárbekti ekinshi raýndta qaıtyp ózine bettetpeı qoıdy. Osylaısha esep 4:3-ke toqtady. Al 81 kılodaǵy Ádilbek Nııa­zymbetov astanalyq Dáýren Eleýsinovti 3:0 (29:28, 29:28, 30:27) etip qapy qaldyryp, komandalyq esepti 4:4-ke jetkizdi.

Endi bárin sońǵy eki jekpe-jek sheshetin boldy. Munda Astana bylǵary qolǵap sheberleriniń abyroılary asyp ketti. Áýeli 91 kıloǵa deıingi salmaqtaǵy Vasılıı Levıt óz áriptesi Azamat Ábilevti birinshi raýndta tehnıkalyq nokaýtpen alańnan shyǵaryp tastady. Sońynan 91 kılodan aýyr salmaqta Ermek Úsenov qarsylasy Maǵjan Bazarbaıdan basym tústi.

Sóıtip, Astana quramasy ekinshi márte Kýbokqa qol jetkizdi. Al ótken jyly ǵana Kýbokty arqalap qaıtqan Mańǵystaý mar­qasqalary osymen 4 maý­symnyń 3-ýinde fınalda shaıqasyp otyr.

Taǵy bir derek, Astana komandasy jartylaı fınalda Ońtústik Qazaqstan qura­ma­synan 6:5 esebimen asyp tússe, Mańǵystaý ob­lysy Qaraǵandy jasaǵyn 7:3 etip eńsergen edi.

Damır QOJAMQUL.