Jıynda Qazaqstan Respýblıkasynyń 2025 jylǵa deıingi ulttyq damý josparyn ázirleý, Memlekettik josparlaýdyń jańa júıesi, Memlekettik basqarýdy damytýdyń 2030 jylǵa deıingi tujyrymdamasy, 2021-2025 jyldarǵa arnalǵan jekeshelendirý josparynyń jobasy, sondaı-aq, Jedel reformalar paketi jáne ulttyq halyq sanaǵyn ótkizý máseleleri qarastyryldy.
Keńeste Premer-Mınıstr Asqar Mamın, Prezıdent Ákimshiligi Basshysynyń orynbasary Tımýr Súleımenov, Strategııalyq josparlaý jáne reformalar agenttiginiń tóraǵasy Qaırat Kelimbetov, Memlekettik qyzmet isteri agenttiginiń tóraǵasy Anar Jaıylǵanovalar baıandama jasady.
Kún tártibindegi máseleler boıynsha keńes músheleriniń baıandamalary men pikirlerin tyńdaǵan Prezıdent kóterilgen máselelerge egjeı-tegjeıli toqtalyp, olardy iske asyrýdyń naqty tetikteri týraly óz oıymen bólisti.
Memlekettik josparlaýdyń jańartylǵan júıesiniń baǵdarlamalyq qujattary meıilinshe ıkemdi bolýǵa, strategııalyq jáne bıýdjettik josparlaýdyń ózara baılanysyn arttyrýǵa, memlekettik organdar men uıymdar basshylaryna qoıylǵan mindetterdi oryndaý úshin tikeleı jaýapkershiligin aıqyn bekitýge tıis.
Álemniń kóshbasshy memleketteriniń qataryna kirý maqsatynda elimizdi odan ári damytýdyń negizgi úsh baǵyty, atap aıtqanda, ınstıtýttardyń sapasyn jetildirý, azamattardyń ál-aýqatyn arttyrý, myqty ekonomıka qurý usynyldy.
Ortamerzimdi perspektıvaǵa arnalǵan mindetterdi aıqyndaıtyn negizgi qujat retinde elimizdiń 2025 jylǵa deıingi ulttyq damý jospary belgilendi. Qujatta asa mańyzdy salalardy damytý boıynsha paıymdar, negizgi saıasatty jetildirý jónindegi basty baǵdarlar kórinis tabady.
Ulttyq jobalar qyzmet túrleri men salalardyń túıitkildi máselelerin sheshýge baǵyttalady. Jobalar belgili bir kezeńde naqty nátıjege qol jetkizýi jáne ol tolyqtaı qarjylandyrýy kerek.
Qazirgi ýaqytta sıfrlandyrý, agroónerkásiptik keshendi damytý, kásipkerlik, básekelestik, qorshaǵan ortany qorǵaý jáne basqa da birqatar jobalardy ázirleý jumystary júrgizilýde. Olar bıylǵy 1 shildege deıin daıyndalyp, bekitilýi tıis.
Qasym-Jomart Toqaev naqty salaǵa qatysty máselelerdi talqylaýǵa mamandanǵan sarapshylardy tartý, al qoǵamda qyzý talqylanǵan taqyryptar boıynsha belsendi azamattardy keń aýqymda jumyldyrý múmkindigin qarastyrýdy tapsyrdy.
Úkimet usynǵan Qazaqstan Respýblıkasynyń 2025 jylǵa deıingi ulttyq damý josparynyń jobasy 12 strategııalyq baǵyttan turady. Olar ınstıtýsıonaldyq, ekonomıkalyq jáne áleýmettik bolyp úsh salaǵa bólingen.
Damý jospary boıynsha 2025 jylǵa qaraı ósim deńgeıi 5 paıyzǵa artyp, jalpy ishki ónimdegi shaǵyn jáne orta bıznestiń úlesi 35 paıyzǵa deıin, negizgi kapıtalǵa tartylǵan ınvestısııalar kólemi JIО́-niń 30 paıyzyna deıin, shıkizattyq emes eksportty 2 esege, ıaǵnı, 41 mıllıard teńgege deıin, eńbek ónimdiligin 45 paıyzǵa ulǵaıtý negizgi kórsetkish bolmaq.
Qazaqstandyqtardyń turmys deńgeıi men sapasyn arttyrý jónindegi sharalardyń nátıjesinde azamattardyń ómir súrý uzaqtyǵy 75 jasqa deıin ulǵaıýy tıis.
Qazaqstannyń halyqaralyq reıtıngterdegi deńgeıin, atap aıtqanda, oqýshylardyń bilim kórsetkishteri, sıfrlyq básekege qabilettilik, zań ústemdigi ındeksteri boıynsha jaqsartý josparlanýda.
Atalǵan qujatqa qatysty pikir bildirgen Prezıdent Ulttyq jospar búgingi jahandyq úrdisterdi eskere otyryp, el damýynyń negizgi baǵdarlary men sıfrlyq parametrlerin qalyptastyratynyn atap ótti. Qasym-Jomart Toqaevtyń pikirinshe, elimizdiń ortamerzimdi perspektıvadaǵy damýy atalǵan reformalardyń sapaly iske asyrylýyna tikeleı baılanysty bolmaq.
Strategııalyq kórsetkishterdiń egjeı-tegjeıli kartasy – Ulttyq jospardyń ajyramas bóligi. Soǵan sáıkes árbir memlekettik organǵa jáne iri kvazımemlekettik uıymǵa belgilengen kezeńde qol jetkizýge tıis naqty kórsetkishterdiń tizbesi bekitiledi. Kórsetkishterdiń nátıjesi aqıqattan alys bolmaýy kerek. Degenmen ońaı qol jetetin jáne yntalandyrmaıtyn ındıkatorlardy maqsat etýge bolmaıdy.
– Bizdiń basty maqsatymyz – básekege qabilettilik deńgeıin arttyrý jáne álemniń damyǵan memleketteriniń qataryna kirý, – dedi Qasym-Jomart Toqaev.
Ulttyq damý josparynyń aıasynda usynylǵan reformalardyń kóbisi Kásipkerlik, Bıýdjettik jáne Salyq kodeksi sııaqty zańnamalyq aktilerge ózgerister engizýdi qajet etetinin eskere otyryp, Memleket basshysy Úkimettiń Parlamentpen konstrýktıvti jumys isteýi qajet ekenin atap ótti.
– Depýtattyq korpýs Ulttyq jospardyń tabysty júzege asýy úshin barlyq qajetti zańnamalyq bazany qamtamasyz etýge tıis, – dedi Prezıdent.
Budan keıin jıynda Memlekettik basqarýdy damtýdyń 2030 jylǵa deıingi tujyrymdamasynyń jobasy qarastyryldy.
Tujyrymdamanyń júzege asyrylýy ákimshilik-baqylaýǵa baǵyttalǵan ádisten adam men onyń ıgiligi basty qundylyqtar sanalatyn memleket pen halyqtyń ózara yqpaldastyq modeline kóshýdi qamtamasyz etedi.
Osy qujattyń aıasynda memlekettik apparattyń kásibıligin jetildirýge, onyń qoǵam aldyndaǵy eseptiligine, retteýshilik saıasatty ilgeriletý máselelerine, memlekettik qyzmet kórsetýdiń tıimdiligin arttyrýǵa, kvazımemlekettik sektordy ońtaılandyrýǵa, jergilikti basqarý isin damytýǵa jáne t.b jol ashylady.
Jalpy, Tujyrymdamada qamtylǵan sharalar memlekettik apparattyń tıimdiligin arttyrýǵa jáne onyń ashyqtyǵyna yqpal etedi. Bul memlekettik basqarý ınstıtýtyna degen senim deńgeıin kóteredi.
Tujyrymdamanyń negizgi erejeleri 2025 jylǵa deıin iske asyrylýy tıis. Al onyń negizgi qaǵıdalary bıyl oryndalady.
Qasym-Jomart Toqaev atalǵan qujat qoǵam talabyna saı keledi jáne halyqtyń turmys sapasyn jaqsartýǵa baǵyttalǵan aýqymdy ári mańyzdy ózgeristerdi qamtıdy dep sanaıdy. Osyǵan oraı Prezıdent Úkimetke tıisti resýrstardy bóle otyryp, egjeı-tegjeıli saralanǵan Is-qımyldar josparyn qabyldaýdy tapsyrdy.
Sonymen qatar 2021-2025 jyldarǵa arnalǵan jekeshelendirý josparynyń jobasy usynyldy.
Memleket basshysynyń buǵan deıin bergen tapsyrmasyna sáıkes, tolyqtaı nemese jartylaı jeke básekelestik sektorǵa ótetin uıymdardyń sany 176-dan 736-ǵa deıin ulǵaıdy.
Básekelestik ortaǵa 5 trıllıon teńge kólemindegi aktıvterdiń berilýi memlekettiń ekonomıkaǵa aralasýyn 14 paıyzǵa deıin qysqartýǵa múmkindik beredi. Osyǵan oraı strategııalyq ınvestorlar tartylyp, shaǵyn jáne orta bıznestiń jekeshelendiriletin kompanııalardyń qyzmetine qoljetimdiligi saqtalady jáne keńeıedi.
Memlekettiń ekonomıkadaǵy úlesin azaıtý jumystary aıasynda Qasym-Jomart Toqaev atalǵan máselege egjeı-tegjeıli toqtaldy.
Prezıdent aldyńǵy jekeshelendirý kezindegi nysandardyń basym bóligi birshama keıinge shegerilgen nemese múlde alynyp tastalǵan tájirıbeni eske saldy.
– Jumystyń jospar boıynsha júrýi asa mańyzdy. Bul turǵyda Úkimettiń ustanymy qatań bolýy qajet. Jekeshelendirýdiń sońy jeke monopolııalardyń paıda bolýyna ákep soqtyrmaýy kerek. Ondaı jaǵdaı qoǵamnyń narazylyǵyn týdyrady. Jekeshelendirý úderisi kezinde ashyqtyq pen ádildikti qamtamasyz etý qajet, – dedi Memleket basshysy.
Osy rette Prezıdent Úkimetke nysandardy satýǵa qoǵamdyq monıtorıng júrgizýdiń tetikterin ázirleýdi tapsyrdy.
Sonymen qatar Memleket basshysy IPO quraldaryn meıilinshe keń paıdalanýdyń qajettigin aıta kelip, jekeshelendirý máselesinde bul tetikke basymdyq berýdi atap ótti.
– «Halyqtyq IPO» baǵdarlamasyn qaıta jańǵyrtyp, aksııalardy, eń aldymen, jeke tulǵalarǵa, ıaǵnı, Qazaqstan azamattaryna satý kerek. Elimizdiń árbir azamatynda ulttyq baılyqtyń bir bóligin ıelený múmkindigi bolýy qajet, – dedi Qasym-Jomart Toqaev.
Jıynda Prezıdenttiń tapsyrmasyna sáıkes ázirlengen jedel sharalar toptamasy talqylandy.
Atalǵan sharalar shaǵyn jáne orta bıznes sýbektileri úshin tólem tetigin jeńildetý jáne eńbekaqy qoryna salyq júktemesin azaıtý, jańa óndiris kompanııalary úshin QQS boıynsha mólsherlemelerdi 70 paıyzǵa tómendetý, «Bıznestiń jol kartasy» sýbsıdııalaý baǵdarlamasyna mıkroqarjy uıymdaryn qosý jáne basqa da joldar arqyly ekonomıkanyń sapaly ári turaqty damýyn qamtamasyz etýge baǵyttalǵan.
Zańmen bekitkennen keıin bul normalar osy jyldyń 1 shildesinen bastap júzege asyrylýy tıis.
Qasym-Jomart Toqaev ulttyq sanaqty uıymdastyrý máselesin aıta kele, halyq sanaǵy turǵyndardyń naqty sanyn, onyń jas jáne genderlik quramyn, ýrbanızasııa deńgeıin, tabys kólemi men basqa da mańyzdy taldaý derekterdi anyqtap, tekserilgen ári dáıekti basqarýshylyq sheshimder qabyldaýǵa múmkindik beretin atap ótti.
Prezıdent atalǵan sharadan meıilinshe mol maǵlumat alý úshin saýalnamanyń mazmunyna kóńil bólý qajet ekenin aıtty. Bul rette Memleket basshysy azamattarǵa asa kóp saýal qoımaýdy jáne sanaqty ótkizýdiń ońtaıly joldaryn paıdalanýdy, onyń ishinde, pandemııanyń taralýyna jol bermeýge baılanysty shekteýlerdi eskere otyryp, sıfrlyq tehnologııalardy keń qoldanǵan jón dep sanaıdy.
Qasym-Jomart Toqaev Úkimetke Premer-Mınıstrdiń birinshi orynbasarynyń tóraǵalyǵymen arnaıy jumys tobyn qurýdy tapsyrdy. Atalǵan top uıymdastyrý jáne negizgi máselelerdi sheshýmen, sondaı-aq, daıyndyq jumystaryn úılestirip, ony iske asyrýmen aınalysady.
Ulttyq sanaq osy jyldyń qazan aıynda ótkizilip, al 2022 jyldyń ortasyna qaraı Úkimet naqty málimetterdi jarııalaýy tıis.
