Teatr • 02 Aqpan, 2021

«Astana Operada» – «Teatr sabaǵy»

Karantınniń qatań talaptaryn da tabysty izdenisterimen sheber úılestirgen «Astana Operanyń» kórermenderine usynar jańashyl jobalary taýsylar emes. 30 qańtarda teatr ujymy Nur-Sultan qalasy ákimdigimen birlese otyryp, 9-synyp oqýshylaryna arnalǵan «Teatr sabaǵy» atty jańa, qyzyqty shyǵarmashylyq jobany bastaıdy. Onyń maqsaty – óskeleń urpaqty estetıkalyq tárbıege baýlý.

Nazerke JUMABAI

Memleket basshysy Qasym-Jomart Toqaev óziniń Qazaqstan halqyna Joldaýynda: «Balalar úshin qaterli búgingideı aýmaly-tókpeli zamanda olardyń kúsh-jigeri men qyzyǵýshylyǵyn durys arnaǵa baǵyttaý asa mańyzdy. Balalar memleketimizdiń bolashaǵy emes pe?!» dep atap ótken bolatyn. Bul úndeý elimizdiń barlyq mádenı oshaqtarynyń shyǵarmashylyq izdenister aýqymyn barynsha santaraptandyrǵany ras. Osy turǵyda «Astana Opera» teatrynyń da elordanyń rýhanı-mádenı ómirindegi belsendi aǵartýshylyq qyzmetin atap ótken jón. Onyń aıqyn aıǵaǵy – teatr repertýaryndaǵy balalar men jasóspirimderge arnalǵan túrli jobalar men konsertter.

«Teatr sabaǵyn» ótkizý úshin bas shahar ákimdigi oqýshylardy uıymdastyrý jáne ózge de mańyzdy máselelerdi óz moınyna aldy.

– Bul joba mektep qabyrǵasynan bastap oqýshylardyń boıyna mádenıetke degen mahabbat pen adamı-rýhanı qundylyqtardy sińirip qana qoımaı, sondaı-aq olardyń shyǵarmashylyq qabiletteri men daryndaryn ashýǵa múmkindik beredi, – degen qala basshysy Altaı Kólginov teatrmen birlese júzege asyratyn is-sharanyń mańyzdylyǵyn atap ótti.

Al joba jetekshisi Mádenıet qaıratkeri, elimizge tanymal mýzykatanýshy Marjan Jákenova bolsa: «О́kinishke qaraı, karantın jaǵdaıynda balalar túrli gadjetterdi anaǵurlym kóp paıdalanady, teledıdardy kóp kóredi, kompıýterlik oıyndar oınaıdy. Sondyqtan opera jáne balet ártisterimiz ben orkestr mýzykanttarynyń sheberligi, sán-saltanaty jarasqan tamasha teatrymyz balany jańa atmosferaǵa bólep, oǵan asqaq óner áleminiń esigin ashady dep úmittenemiz. Bizdiń mindetimiz – bolashaqtaǵy kórermenderimizdi, opera jáne balet ónerin súıer qaýymdy mektep jasynan bastap qalyptastyrý», dep atalǵan joba týraly óz pikirimen bólisip, ásirese karantın jaǵdaıynda mádenı jobalardyń balalar men jasóspirimder tárbıesindegi mańyzyna keńinen toqtaldy.

– «Teatr sabaǵyn» tek joǵary synyp oqýshylary, ıaǵnı bozbalalar men boıjetkender úshin ótkizý týraly sheshim qabyldandy. Olardyń keıbireýi, árıne, teatrda bolǵan, alaıda óner ordasyna kelýdiń árbir sáti – bul árdaıym meıram emes pe! Teatrda eshqashan bolyp kórmegen, jaı ǵana janynan ótip bara jatyp, bul qoljetimsiz dep oılaǵan balalar da bar. Shyn máninde, teatrdyń esigi balalar úshin de, eresekter úshin de aıqara ashyq, – dep sózin jalǵastyrdy mýzykatanýshy.

Balalar úshin alǵashqy teatr qońyraýy 30 qańtarda soǵylady. Jas kórermender nazaryna álemdik horeografııa jaýhary L.Mınkýstyń «Baıaderka» baleti daıyndaldy. Is-shara baǵdarlamasyna sáıkes oqýshylar teatrǵa spektakldiń bastalýyna deıin 2 saǵat buryn keledi. Olardyń nazaryna slaıdtardy qoldaný arqyly tartymdy túrde 15 mınýttyq dáris ázirlendi. Tájirıbeli mýzykatanýshylar balettiń mazmuny, kompozıtory, horeografy qoıylym týraly, sondaı-aq balalardyń bul kúni sahnadan kóretin solıster týraly qyzyqty aqparatty áńgimelep beredi.

Teatr sabaǵyna 30 oqýshy keledi. Olar on adamnan úsh topqa bólinedi. Teatr boıynsha balalardy sahna syrty álemine saıahat jasatý úshin arnaıy bekitilgen ekskýrsııa jetekshileriniń jol bastaýymen túziletin tushymdy aqparatqa toly úsh baǵdar ázirlendi.

– Balalar qoıylymdy jasaýdyń artynda qanshama adamnyń turǵanyn kóredi. Biz grım jasaý bólmelerine bas suǵamyz, olar ártisterge qalaı grım jasaıtynyn, qandaı jasandy shashtardyń bolatynyn kóredi. Odan keıin kostıýmerlik sehqa kiremiz. Onda balalar balet pachkasyn ustap kórip, onyń qanshalyqty jeńil ekenine kóz jetkize alady. Jeńil balet kostıýmderi men mysal retinde XVIII ǵasyrdyń aıbyndy opera kıimderi arasyndaǵy aıyrmashylyqty kóredi. Aıaq kıim sehynda balalar naǵyz balet pýantalaryn qolmen ustap kóre alady. Olarǵa býtafor jáne rekvızıt sehtary da qyzyqty bolatyny sózsiz. Bul jerde jas kórermender býtaforııanyń ne ekendigin jáne dekorasııalardyń qalaı jasalatynyn biletin bolady. Ekskýrsııa kezinde barlyq qaýipsizdik sharalary saqtalady – balalar bastaryna kaska kıedi. Sondaı-aq olardyń baǵdaryna mýzykalyq kitaphana, daıyndyq zaldary men taǵy da basqa qyzyqty jobalar usynylatyn bolady, – dep sózin túıindedi joba jetekshisi Marjan Jákenova.

Osy oraıda teatrda betperde taǵyp júrý, qoldy tazartyp, zararsyzdandyrý, kórermen zalyna áleýmettik araqashyqtyqty eskerip otyrǵyzý sııaqty sanıtarııalyq normalardyń tolyqtaı saqtalatyndyǵyn atap ótý mańyzdy. Al «Teatr sabaǵynan» oqýshylardyń teńdessiz rýhanı áser alatyndyǵyna senemiz.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz