Ekologııa, geologııa jáne tabıǵı resýrstar mınıstrligi Sý resýrstaryn basqarý jónindegi memlekettik baǵdarlamanyń jobasyn ázirledi. Búginde atalǵan memlekettik baǵdarlamany ulttyq jobaǵa aınaldyrý jumystary júrgizilýde.
Alty negizgi baǵyt anyqtaldy.
Birinshi. Sý dıplomatııasyn nyǵaıtý úshin memleketaralyq sý qatynastaryn jetildirý.
Ekinshi. Sý resýrstaryn sıfrlandyrý, esepke alý jáne monıtorıngileý. Nátıjesinde 119 sý arnasynda sıfrlandyrý jumystary júrgiziledi. Sonymen qatar, ózen aǵynynyń resýrstaryn aıqyndaýdyń aqparattyq júıesi qurylady jáne t. b.
Úshinshi. Sýdy únemdeý. Nátıjesinde zamanaýı sý únemdegish tehnologııalar qoldanylatyn sýarmaly jerdiń kólemi 221 myń gektardan 420 gektarǵa deıin ulǵaıady.
Tórtinshi. Irrıgasııalyq júıeler men qurylystardy qalpyna keltirý, jańa sý qoımalaryn salý.
«Nátıjesinde shamamen 2 myń shaqyrym magıstraldyq arna rekonstrýksııalanady. Odan bólek, jalpy kólemi 885 mln m3 bolatyn Jambyl (3), Batys-Qazaqstan (2), Túrkistan (1), Almaty (1) jáne Qyzylorda oblystarynda 8 jańa sý qoımasy salynady. Al 2025-2030 jyldar ishinde taǵy 31 sý qoımasy salynatyn bolady», — dedi M. Myrzaǵalıev.
Besinshi. Quqyqtyq bazany jańartý. Osy jumystyń aıasynda jańa redaksııadaǵy Sý kodeksi ázirlenedi.
Altynshy. Sý salasynyń mamandaryn qazirgi zamanǵy daǵdylarmen daıarlaý jáne ǵylymı qamtamasyz etý.
«Jasyl Qazaqstan» ulttyq jobasy 7 negizgi bólimnen turady: sý nysandaryn saýyqtyrý, aýanyń lastaný deńgeıin tómendetý, qaldyqtardy basqarý, bıoalýantúrlilikti saqtaý, eldi kógaldandyrý, energııa tıimdiligi, ekologııalyq bilim jáne ekologııalyq mádenıetti arttyrý.
Bul aýanyń lastaný deńgeıi joǵary 10 qala - Temirtaý, Nur-Sultan, Almaty, Aqtóbe, Atyraý, О́skemen, Qaraǵandy, Balqash, Jezqazǵan, Shymkent qalalaryndaǵy jaǵdaıdy jaqsartýǵa múmkindik beredi.
«Budan basqa, 2025 jylǵa qaraı sarqyndy sýlardy aǵyzý kólemin tómendetýge qol jetkizýdi, qaldyqtardy qaıta óńdeý úlesin aǵymdaǵy 18%-dan 35% deıin arttyrýdy, sondaı-aq eldiń JIО́-niń energııa syıymdylyǵyn azaıtýdy josparlap otyrmyz. Eki ulttyq jobany ázirleý jáne bekitý jumystary aǵymdaǵy jyldyń 1 shildesine qaraı aıaqtalady», — dedi ekologııa, geologııa jáne tabıǵı resýrstar mınıstri.
Orman qorynda 2 mlrd aǵash otyrǵyzý boıynsha júrgiziletin jumystardyń tıimdiligi barysyna qoǵamdyq monıtorıngti júzege asyrý maqsatynda, Ekologııa mınıstrliginiń qoldanystaǵy geoportalynyń negizinde ınteraktıvti karta qurý usynylady. Qazir osy geoportalda orman órtteri men zańsyz aǵash kesý monıtorıngi onlaın rejımde júzege asyrylýda. Geoportal «Ǵarysh Sapary» kompanııasymen birlesip pysyqtalatyn bolady. Kartada jyldar boıynsha óńir-óńirge bólingen aǵash otyrǵyzý josparlary kórsetiledi.
Mınıstrdiń aıtýynsha, jergilikti atqarýshy organdar bekitilgen Keshendi josparlardyń sheńberinde ormandardy molyqtyrý jáne orman ósirý jónindegi jumystardy ýaqtyly júzege asyrýy qajet.
