Mınıstrdiń aıtýynsha, búgingi tańda 7 negizgi baǵyt aıqyndalǵan. Bul — ekonomıkalyq belsendilikti qoldaý, jumys oryndarymen qamtamasyz etý, júıelik jáne salalyq saıasatty qaıta retteý, turǵyn úıge qoljetimdilikti arttyrý, densaýlyq saqtaý jáne bilim berý júıesin damytý. Barlyǵy 68 tapsyrma berildi. Osy tapsyrmalardy iske asyrý sheńberinde 3 zańnamalyq akti qabyldanatyn bolady. Bul – Derbes derekter jáne olardy qorǵaý týraly, básekelestik máseleleri jónindegi zańdar, sondaı-aq Jer kodeksine engiziletin ózgerister.
Sonymen qatar 3 ulttyq jobany bekitý kózdelýde, olar – agroónerkásip keshenin damytý, sý resýrstaryn basqarý jáne «2021-2025 jyldarǵa arnalǵan Jasyl Qazaqstan» jobalary.
«5 keshendi jospar ázirlenedi. Bul – shekaralardaǵy zańsyz saýda aınalymyna qarsy is-qımyl, offteık-kelisimsharttar men retteletin satyp alýlar arqyly óndiristerdi qurý jáne keńeıtý, Ekibastuz qalasyn 2025 jylǵa deıin damytý, azamattarǵa vaksınasııa júrgizý jáne mektepke deıingi bilim berýdi damytý sharalary», — dedi Á. Erǵalıev.
Ulttyq ekonomıka mınıstrligi Memleket basshysynyń árbir tapsyrmasyn is júzinde oryndaý boıynsha naqty sharalar ázirledi. Birinshi. Osy jylǵy mamyrdyń sońyna deıin salyq-bıýdjet saıasatyn jetildirý boıynsha usynystar engiziledi. Usynystardy ázirleý úshin «Atameken» ulttyq kásipkerler palatasy jáne salyq zańnamasyn jetildirý jónindegi sarapshylar qaýymdastyǵynyń qatysýymen jumys toby qurylady. Nátıjesinde básekege qabiletti shıkizattyq emes sektorǵa negizdelgen ekonomıkanyń jańa qurylymyn qalyptastyrýdy yntalandyrý úshin salyqtyq sharalar toptamasy daıyndalatyn bolady.
«Memlekettik qarjy teńgerimdiligin qamtamasyz etý, olardyń ornyqtylyǵyn, sondaı-aq qabyldanatyn bıýdjettik sheshimderdiń tıimdiligin arttyrý boıynsha sharalardy kózdeıtin 2030 jylǵa deıingi jańa bıýdjet saıasaty tujyrymdamasynyń jobasy qalyptastyrylatyn bolady», — dedi vedomstvo basshysy.
Ekinshi. Shaǵyn jáne orta bıznesti qoldaý jóninde sharalardy ázirleý úshin «Atameken» ulttyq kásipkerler palatasy men sarapshylar qaýymdastyǵynyń qatysýymen jumys toby qurylady. Bir aı ishinde ázirlengen shoǵyrlandyrylǵan usynystar Ekonomıkalyq ósimdi qalpyna keltirý jónindegi memlekettik komıssııanyń qaraýyna engiziletin bolady.
Úshinshi. Memlekettik qoldaýdyń tıimdiligin arttyrý maqsatynda memlekettik qoldaý alǵan bıznes sýbektileriniń árqaısysy boıynsha monıtorıngtiń biryńǵaı qaǵıdalary ázirlenetin bolady.
Sondaı-aq sýbektilerdiń kóp ólshemdi jáne serpindi monıtorıng júıesi qalyptastyrylady. Bul memlekettik qoldaý sharalarynyń ekonomıkalyq jáne áleýmettik qaıtarymyn baǵalaýǵa múmkindik beredi.
Tórtinshi. Osy jyly óńirlik saıasat salasynda Qyzylorda oblysynyń ekonomıkasyn ártaraptandyrý boıynsha sharalar qabyldanatyn bolady.
Mınıstrdiń aıtýynsha, Qyzylorda oblysynyń áleýmettik-ekonomıkalyq damýynyń keshendi jospary ózektendiriledi. Josparǵa óńir ekonomıkasynyń jańa qurylymyn qalyptastyrý jónindegi sharalar engiziledi.
Besinshi. Múddeli memlekettik organdar men Pavlodar oblysy ákimdiginiń qatysýymen Ekibastuz qalasynyń áleýmettik-ekonomıkalyq damýynyń keshendi jospary ázirlenedi. Keshendi jospardy Pavlodar oblystyq máslıhaty bıylǵy qyrkúıekte bekitedi.
Altynshy. Bıýdjet qarajatyn únemdeý maqsatynda bıylǵy jyly memlekettik apparattyń qosalqy qyzmetterin ortalyqtandyrý jáne ońtaılandyrý júrgiziletin bolady. Bul – kadr, qarjy jáne ákimshilik-sharýashylyq qyzmetterin, sondaı-aq AT-men qamtamasyz etý salalaryn qamtıdy.
«Osyǵan baılanysty, naqty merzimderin kórsete otyryp, qosalqy qyzmetterdi ortalyqtandyrý jáne ońtaılandyrý jónindegi sharalardy iske asyrýdyń jol kartasy ázirlenedi», — dedi Á. Erǵalıev.
Jetinshi. Osy aıdyń sońyna deıin «Memlekettik jáne jeke menshik operatorlardy qurýǵa moratorıı engizý týraly» Prezıdent Jarlyǵynyń jobasy ázirlenetin bolady.
