Eńbekmıniniń basshysy óz sóziniń basynda Úkimettiń keńeıtilgen otyrysynda Prezıdent Mınıstrler Kabınetiniń negizgi mindeti – ekonomıkalyq ósimdi qalpyna keltirý jáne qazaqstandyqtardyń naqty tabysyn arttyrý ekenin erekshe atap ótkenin eske saldy.
Osyǵan baılanysty, Eńbekmıni basshysynyń tapsyrmasy boıynsha Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasynyń tetikteri kásipkerlikti damytý úshin halyqqa kredıt berýge mıkroqarjy uıymdarynyń qatysýyn jandandyrý bóliginde, sondaı-aq Jumyspen qamtý jol kartasy jumysqa ornalastyrý týraly derekterdi avtomatty túrde qaıta tekserý tásilderin engizý bóliginde jetildirildi.
«Memleket basshysynyń tapsyrmalaryn oryndaý maqsatynda Eńbek jáne halyqty áleýmettik qorǵaý mınıstrligi aǵymdaǵy jylǵy naýryz aıynyń sońyna deıin «Eńbek» memlekettik baǵdarlamasyna memlekettiń jáne «Atameken» Ulttyq kásipkerler palatasynyń qatysýymen mıkroqarjy uıymdaryn qurý bóliginde ózgerister engizýdi josparlap otyr. «Atameken» UKP jáne jergilikti atqarýshy organdardyń qatysýymen mıkroqarjy uıymdary sońǵy qaryz alýshylarǵa nomınaldy syıaqy mólsherlemesi jyldyq 6% - dan aspaıtyn mıkrokredıtter beretin bolady», dedi S. Shápkenov.
Sonymen qatar, mınıstr jergilikti atqarýshy organdar «Atameken» UKP-men birlesip qaryz alýshylardyń jobalaryn súıemeldeýdi uıymdastyrýdy turaqty negizde qamtamasyz etýi qajet ekenin atap ótti.
Eńbekmıniniń basshysy sondaı-aq jumyspen qamtý men kásipkerlikti qoldaý jónindegi jańa tásilder men tetikterdi qamtıtyn 2022-2026 jyldarǵa arnalǵan «Eńbek 2.0» ulttyq jobasy ázirlenetinin habarlady.
«Bıyl biz jumyspen qamtý jol kartasy sheńberinde ınfraqurylymdyq jobalardy irikteý, jumyssyzdardy jumysqa ornalastyrý jáne mıkrokredıt berý boıynsha jańa tásilderdi tolyq qarap, ázirledik.
Turaqty jumys oryndaryn qurý jónindegi sharalardy kúsheıtý úshin kúrdeli, aǵymdaǵy jóndeý jónindegi jobalar alynyp tastaldy jáne uzaq merzimdi tıimdilikke basa nazar aýdara otyryp, qurylys jáne rekonstrýksııalaý jónindegi jobalar irikteldi», dep habarlady mınıstr.
Onyń aıtýynsha, bıyl 27 myń jumys ornyn qurýmen 331 ınfraqurylymdyq jobany iske asyrý josparlanýda, onyń ishinde 40% nemese 10 myńnan astam jumys orny – turaqty.
Sondaı-aq Serik Shápkenov Eńbek jáne halyqty áleýmettik qorǵaý mınıstrligi eńbek sharttaryn esepke alý júıesinde adamdardy birneshe ret qaıta engizýge jáne eńbek sharttaryn tirkeýge jol bermeý boıynsha jumys júrgizip jatqanyn atap ótti. Jumysqa ornalastyrý týraly derekterdi avtomatty túrde qaıta tekserýdi qamtamasyz etý úshin Qarjy mınıstrligi mindetti zeınetaqy jarnalarynyń túsimderine avtomattandyrylǵan baqylaý ornatý bóliginde, al Indýstrııa jáne ınfraqurylymdyq damý mınıstrligi qazaqstandyq qamtý bóliginde óz aqparattyq júıelerin pysyqtaıdy.
