Bul týraly «Shyńǵa órleý» qoǵamdyq qory dırektorynyń orynbasary Nazykúl Isabekova «Almaty» telearnasyndaǵy «Basty nazarda» baǵdarlamasynda aıtty.
«Shyńǵa órleý» jobasy az qamtylǵan jáne kópbalaly otbasynan shyqqan balalardyń ýaqytyn tıimdi paıdalaný maqsatynda uıymdastyrylǵan. Klýbta balalar óz qalaýy boıynsha túrli úıirmege tegin qatysa alady. Olardyń qatarynda dombyra, shahmat, vokal, qolóner, horeografııa sabaqtary bar. Sondaı-aq dene shynyqtyrý jáne ózindik daıyndyq saǵattary bar. Jobanyń ereksheligi de sol, balalarǵa oqytýshylar retinde ardagerler úıindegi qarııalar men múgedekter shaqyrylady. Alaıda olarǵa qoıylatyn arnaıy talaptar bar.
«Oqytýshylardy jumysqa qabyldaýda ózindik erejeleri bar. Dıplomyn, jumys tájirıbesin qaraımyz. Eger balalarǵa úıreter óneri bolsa, jumysqa alamyz. Buryn oqytýshy bolǵan ardagerler, mýzykanttar, ártister tárbıe jumystaryna atsalysyp jatyr. Búginde Almaty qalasynda 5 aýdan boıynsha 102 oqytýshyny jumysqa aldyq», dedi N.Isabekova.
Qazirgi kezde Almaty qalasynyń 5 aýdanynda atalǵan joba aıasynda klýbtar jumys isteýde. Endi Bostandyq, Medeý, Túrksib aýdandarynda ashylmaq. Bir klýbqa 2 aýysymǵa bólinip 60 oqýshy keledi. Olar tegin tamaqtanyp, úıirmelerge qatysady. Sonymen qatar úı jumystaryn úlkenderdiń kómegimen oryndaıdy. N.Isabekova úıirme balalarǵa unap jatqanyn aıtty.
«Shyńǵa órleý» jobasy sátti boldy. Birinshi maýsymǵa qatysqan balalar men ata-analar jobaǵa alǵystaryn bildirip jatyr. Ekinshi lekpen de qatysqysy keletinderin aıtty. Alaıda biz kez kelgen balany úıirmege jaza almaımyz, bizge tizimdi mektep ákimshiligi beredi», dedi N.Isabekova.
Aıta keteıik, joba el bıýdjetinen qarjylandyrady.
