Senat Tóraǵasy kezdesýdi asha kelip, atalǵan taqyryptyń mańyzdylyǵyn atap ótti jáne osy salany damytýdaǵy keıbir trendterge toqtaldy.
«Qazaqstannyń bilim jáne ǵylym júıesiniń qalyptasýy men damýy bizdiń memleketimizde árqashan basymdyqtardyń biri bolyp keledi. Elimiz Prezıdentiniń qyrkúıek aıyndaǵy Joldaýynda birqatar mańyzdy tapsyrmalar alǵa qoıyldy. Jalpy alǵanda, elimizdi jańǵyrtý baǵdarlamalary aıasynda osy salaǵa basa nazar aýdarylyp otyr», dedi Máýlen Áshimbaev.
Senat Tóraǵasy COVID-19 bilim berý júıesiniń jumysynyń qyzmetine eleýli problemalar týyndatqanyn atap ótti. Sonymen birge, pandemııa oqytýda jańa ádisterdi engizý múmkindigi men engizý kerektigin, al qashyqtan bilim berý áleýetin keńinen qoldaný kerek ekenin kórsetip otyr.
Máýlen Áshimbaev sondaı-aq bilim berý salasyndaǵy álemniń barlyq elderine tán mazmundy ózgeristerge toqtaldy.
«Oqý ómir boıy jalǵasatyn proseske aınalyp keledi. Bul bilim berý júıesin belgili bir deńgeıde qaıta qurýdy talap etedi. Sondaı-aq sarapshylar arasynda búgingi tańda joǵary bilim berý júıesi qazirgi álemdegi eń mańyzdy eki fýnksııany – ınterpretasııalyq kontekst pen júıeli oılaýdy, sondaı-aq oqýshylarda qundylyq júıesin qalyptastyrýdy atqarmaıdy degen pikir bar», dep atap ótti Senat Tóraǵasy.
Is-sharaǵa Bilim jáne ǵylym mınıstri Ashat Aımaǵambetov qatysty. Ol salalyq mekemede atqarylyp jatqan jumystar men Memleket basshysynyń bilim berý júıesin reformalaý jónindegi tapsyrmalarynyń oryndalýy týraly aıtyp berdi.
«Biz jańa álemde, jańa jaǵdaıda ómir súrip jatyrmyz. Bilim berý júıesi de oǵan beıimdelýi kerek. Másele jańa reformalar júrgizý emes. Bizge barlyq ózgeristerdiń tıimdi bolǵany, qazaqstandyqtardyń bilim deńgeıi arta túskeni, ýaqyt talaptaryna sáıkes keletin quzyretterdi qalyptastyrýǵa jaǵdaı jasalǵany mańyzdy», dep atap ótti mınıstr.
Jas sarapshylar klýbynyń otyrysy barysynda pikirtalasqa qatysýshylar qazaqstandyq bilim men ǵylymnyń ózekti máseleleri boıynsha óz pikirlerimen bólisti.
Youth Corps Projecttegi monıtorıng jáne baǵalaý jónindegi sarapshy, áleýmettanýshy Kamıla Kovıazına orta bilim berýdiń jańartylǵan mazmunyna kóshý aıasynda muǵalimderdiń biliktiligin arttyrý máseleleri týraly aıtyp berdi. Prezıdenttik jastar kadrlyq rezerviniń múshesi, saıasattanýshy Indıra Rystına joǵary jáne joǵary oqý ornynan keıingi bilim berý máselelerine toqtaldy. Kzhol qaıyrymdylyq qorynyń qamqorshylyq keńesiniń múshesi Dıana Erlan erekshe qajettilikteri bar balalarǵa arnalǵan bilim berý salasyn damytý jónindegi óz usynystaryn ortaǵa saldy.
Al Ulttyq bıotehnologııa ortalyǵynyń adam genetıkasy zerthanasynyń meńgerýshisi Maqsat Jabaǵın Qazaqstanda ǵylymı kadrlar daıarlaýdaǵy ózekti máselelerdi atap ótti.
