Aıtystyń ashylýynda qala ákimi Nurlybek Nálibaev alamanǵa qatysýshylarǵa sáttilik tiledi.
Tekti ónerdi tórge ozdyryp, ult murasy ulyqtalǵan jyr dodasynda qurdastar ázili, jastyq jalyn, ini men aǵa syılastyǵy kórinis tapty. Syrdaǵy sóz saıysyn jazýshy, halyqaralyq «Alash» ádebı syılyǵynyń laýreaty, Qazaqstannyń eńbek sińirgen qaıratkeri, dramatýrg Roza Muqanova, Qazaqstan Jazýshylar Odaǵynyń múshesi, Qadyr Myrza Álı atyndaǵy mádenıet jáne óner ortalyǵynyń dırektory, belgili aıtysker aqyn Baýyrjan Halıolla jáne QR mádenıet qaıratkeri, aqyn, rejısser-ssenarıst Ońtalap Nurmahanov syndy esimi elge belgili óner ókilderinen qurylǵan qazylar alqasy baǵalady.
Táýelsizdik taǵylymyn jastardyń sanasyna sińirý, azat elimizdiń jarqyn jetistikterin keńinen dáripteý, rýhanı baı muramyzdy, Otanymyzdy jyrǵa qosýdy murat etken aıtys qorytyndysynda III oryndy pavlodarlyq Raýan Qaıdarov pen qyzylordalyq Erjeńis Ábdıev qanjyǵalasa, sóz báıgesiniń II oryny óskemendik Serik Qýanǵanǵa buıyrdy. Arqalyqtan aqtańger Aıbek Qalıev pen atyraýlyq arqaly aqyn Shalqarbaı Izbasarov I oryndy ózara bólisti.
Aqmeshittegi aıtys alamanynda bas júldeni mańǵystaýlyq Nurlan Musaev ıelendi.
