Jeltoqsannyń 23-si kúni 95-ke qaraǵan shaǵynda aty álemge tanymal avtormatty atý qarýynyń dańqty konstrýktory Mıhaıl Kalashnıkov qaıtys boldy. Bul týraly ITAR-TASS habarlady.
M.Kalashnıkov ústimizdegi jylǵy 17 qarashada asqazanynan qan aǵyp, aýrýhanaǵa jatqyzyldy. Sonda onyń uly Vıktor Kalashnıkov jýrnalısterge ákesiniń 10 qarashada otbasy sheńberinde týǵan kúnin atap ótkennen keıin aldyn alý maqsatynda aýrýhanaǵa jatyp almaqshy bolǵanyn aıtyp edi.
Kalashnıkov búkil álemde jarty ǵasyrdan beri ózine teń keletin tek tappaı kele jatqan avtomatty atý qarýy júıesiniń avtory bolyp tabylady. «Men menikinen artyq avtomat jasaǵan adamnyń qolyn ózim birinshi bolyp alamyn» dedi osydan 30 jyl buryn Mıhaıl Kalashnıkov. Konstrýktordyń osy aıtqany keıin qanatty sózge aınalyp ketti.
Al ataqty óner tapqysh óziniń atyshýly avtomatyn 1947 jyly oılap tapty. Osy jańalyqqa qol jetkizgende ol bar-joǵy 9 synypty ǵana bitirgen serjant shenindegi jaýynger ekeni. Sodan beri bul avtomattyń ártúrli modıfıkasııasy boıynsha 70 mln. danasy shyǵarylypty. Búginde AK (Avtomat Kalashnıkova) avtomatyn álemniń 100-den astam elindegi qarýly kúshter qoldanady jáne XX ǵasyrdyń eń tańǵajaıyp jańalyqtarynyń biri bolyp tabylady.
Mıhaıl Kalashnıkov ómiriniń kóp bóligin Ýdmýrtııanyń astanasy – Ijevsk qalasynda ótkizdi. Mundaǵy ol uzaq jyldar jumys istegen konsernge de keıin óziniń famılııasy berilgen. Ol «Ijmash» jáne «Ijevsk mehanıkalyq zaýyty» dep atalatyn qurylymdardyń basyn biriktirdi.
Mıhaıl Kalashnıkov birneshe ómirbaıandyq kitip jazyp úlgerdi. Ol kúni keshege deıin zaýytta bas konstrýktor bolyp istep keldi. Kalashnıkov Keńes Odaǵynyń Batyry ataǵy men eki márte Sosıalıstik Eńbek Eri ataǵyn alǵan, ıaǵnı soǵystyń da, beıbit eńbektiń de qatar qaharmany bolǵan jalǵyz tulǵa edi.
Sáken Maılybaı.
Derekkóz: ITAR-TASS.
