Aqtaýda onyń jańa qondyrǵysy iske qosyldy
Mańǵystaý týraly «teńizdiń jaǵasynda otyryp, sýǵa jarymaısyńdar» dep ázil-shyny aralas qaǵytyp qalady kórshi aımaqtaǵylar. Ras-aq. Aǵyn sý emes, tostaǵanǵa tunǵan kójedeı tomaǵa-tuıyq bolǵandyqtan, tuzdylyǵy óte joǵary teńiz sýyn tushytyp kádege jaratý kerek. Al bul – úlken jumys. Aqtaýda osy jumysty «MAEK-Qazatomónerkásip» JShS moınyna alǵan.
Aqtaýda onyń jańa qondyrǵysy iske qosyldy
Mańǵystaý týraly «teńizdiń jaǵasynda otyryp, sýǵa jarymaısyńdar» dep ázil-shyny aralas qaǵytyp qalady kórshi aımaqtaǵylar. Ras-aq. Aǵyn sý emes, tostaǵanǵa tunǵan kójedeı tomaǵa-tuıyq bolǵandyqtan, tuzdylyǵy óte joǵary teńiz sýyn tushytyp kádege jaratý kerek. Al bul – úlken jumys. Aqtaýda osy jumysty «MAEK-Qazatomónerkásip» JShS moınyna alǵan.
Mańǵystaýda «MAEK» mekemesiniń mártebesi zor, óıtkeni, aýyz sýdan bólek turmysqa qajetti ystyq jáne sýyq sýyn aıyryp, jylý jáne jaryqpen qamtamasyz etetin mekemeni bilmegende she?! «Dúnıeni nurlandyra túseıik» dep urandatatyn mańǵystaýlyq «MAEK-tiń» emhanasy da elge maqtaýly. О́z qyzmetkerlerin aldymen qabyldaıtyn emhanada uzaq-sonar kezek kútetin turǵyndar, munda eń bastysy, bilikti dárigerlerdiń baryna shúkir etedi.
Qazirgi tańda 4 myńnan astam adamdy jumyspen qamtyp otyrǵan kásiporynda sý tushytatyn qondyrǵylar kónergendikten, olardy jańamen aýystyrý máselesi ózektilikke ıe bolatyn. Osydan onshaqty jyl buryn paıdalanýǵa berilgen qondyrǵylar eskirýmen birge, turǵyndar sany ol jyldardaǵydan áldeqaıda artqan aımaqtyń qajetin óteýge qaýqar-qýat jaǵynan qınalyp ta qalatyn. Jumys istep turǵan 7 qondyrǵynyń eń jańasy osydan bes jyl buryn qoldanysqa engizilgen eken. Eger sý tushytý qondyrǵylary jańarsa, tushytylatyn sý kólemin de, onyń sapasyn da arttyrýǵa bolatyndyǵyn aıtatyn mamandar. Jaqsy oı ulyq merekege oraı ońǵaryldy. Táýelsizdik merekesi qarsańynda «Qazatomónerkásip» UAK» AQ basqarma tóraǵasy V.Shkolnık Mańǵystaýǵa kelip, «MAEK-tegi» qos qýanyshtyń basy-qasynda boldy.
Aımaq basshysy A.Aıdarbaev jáne «Qazatomónerkásip» UAK» AQ basqarma tóraǵasy V.Shkolnık jańadan sý tushytý qondyrǵysyn iske qosý saltanatyna qatysty. Sý tushytý salasyndaǵy jańa úlgi sanalatyn kólbeý tútikti plenkalyq býlandyrǵyshpen jabdyqtalǵan qondyrǵy Fransııanyń «SIDEM» kompanııasynda jasalǵan. Kaspıı teńiziniń ashy sýyn «MAEK-tiń» súzgisinen ótkizip, aýyz sý retinde tutynatyn turǵyndar sapaly sýǵa qol jetkizedi degen úmit bar.
Kásiporyndaǵy ekinshi jańalyq – «MAEK-Qazatomónerkásip» JShS-nyń jóndeýden ótken dárigerlik-sanıtarlyq bóliminiń iske qosylýy boldy. Bir aýysymda 150 adamdy qabyldaı alatyn emhanada 79 dáriger qyzmet etedi. Jatyp em alamyn deýshilerge 20 tósektik oryn da bar. Jóndelgen jańa emhananyń mereıi dárigerlerdiń sapaly qyzmet kórsetýimen asqaqtaı tússe deımiz.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.
Sýretterdi túsirgen Serik MAIEMEROV.
