Jıynnyń ashylý saltanatynda sóz sóılegen Mádenıet jáne sport mınıstri Aqtoty Raıymqulova Alashtyń alyp tulǵasy Qajymuqan Muńaıtpasovtyń mereıtoıyn Mınıstrlik respýblıkalyq deńgeıde atap ótýge daıyndalyp jatqandyǵyn aıtty.
– Qajymuqan atamyz – bar ǵumyryn kúres ónerine arnap, kózi tirisinde ańyzǵa aınalǵan adam. Keı derekterge sensek, balýan babamyz kúrestiń birneshe túrinen 54 memlekette beldesip, 48 medal oljalaǵan. Sonymen qatar Qajymuqan Muńaıtpasuly el esinde bozkilem tórindegi balýandyǵymen qatar, dombyra shertip, án salǵan segiz qyrly, bir syrly ónerpaz retinde qalǵan. Batyr babamyzdyń 150 jyldyǵy osy jyly respýblıka kóleminde atap ótiledi. Búgin álemdi alańdatqan pandemııaǵa baılanysty saltanatty ashylý rásimin keń kólemde atap ótý múmkin bolmaı otyr. Desek te, buǵan qaramastan babamyzdyń 150 jyldyǵy laıyqty, joǵary deńgeıde toılanady dep senimmen aıta alamyn. Qajymuqan Muńaıtpasulynyń esimin ulyqtaý, máńgilik este saqtaý maqsatynda arnaıy respýblıkalyq is-sharalar jospary daıyndaldy. Búginnen bastap respýblıkamyzdyń barlyq óńirinde túrli is-sharalar ótkiziledi. Osy sátti paıdalana otyryp, barshańyzdy soǵan bir kisideı atsalysýǵa shaqyramyn», dedi Aqtoty Raıymqulova.
Shara aıasynda belgili sportshy Sergeı Syrýlnıkov, Tımýr Sypataev sekildi elimizge tanymal zor kúsh ıeleri kópshilikke óz ónerlerin kórsetti. О́z kezeginde Sergeı Syrýlnıkov ótken ǵasyr palýandarynyń murasyn jańǵyrtý mańyzdylyǵyna toqtaldy.
«Basty maqsat – óskeleń urpaqtyń boıyna ata-babalarymyz amanattap ketken qasıetterdi sińirý. Ata-babamyzdyń bizderge qaldyryp ketken murasyn jańǵyrtyp, sonyń negizinde jastardy tárbıeleýge bolady. Sonymen qatar elimizde buqaralyq jáne balalar-jasóspirimder sportyna basa mán berý mańyzdy. Sol jerden bolashaq chempıondar shyǵady. Mınıstrliktiń qoldaýymen men de osy baǵytty damytýdy josparlap otyrmyn», dedi Sergeı Syrýlnıkov.
Resmı is-sharadan keıin Aqtoty Raıymqulova Q.Muńaıtpasov atyndaǵy Olımpıada rezerviniń mamandandyrylǵan Respýblıkalyq mektep-ınternat kolledjiniń jumysymen tanysyp, bilim ordasynda tálim alyp jatqan sportshy jastarmen tildesti.
Tarıhı derekterge súıensek, Qajymuqan Muńaıtpasuly 1871 jylǵy 7 sáýirde Aqmola ýezi, Saryterek bolysyna qarasty Jádik degen jerde dúnıege kelgen. Dúnıejúziniń chempıondary Ivan Poddýbnyı, Ivan Shemıakın, Aleks Aberg, Ivan Zaıkın, Georg Lýrıh, Pol Pons syndy palýandarmen kúresken.
