Jambyl aýdanynda aǵymdaǵy jyly 13000 gektarǵa jazdyq arpa sebý josparlanǵan. Ol úshin 2080 tonna tuqym daıyndalypty. Qazir sharýashylyqtar aýa raıynyń qolaılylyǵyn paıdalanyp kóktemgi dala jumystaryn bastap úlgergen.
«Qazir aldymyzda kóktemgi egis jumystaryn sapaly jáne der kezinde ótkizý mindeti tur. Aýdanda ústimizdegi jyly aýyl sharýashylyǵy daqyldarynyń egis kólemi 57371 gektardy quraıdy dep josparlanýda. Bul ótken jylǵy egis kólemimen salystyrǵanda 568 gektarǵa artyq. Osy oraıda jazdyq arpa, kókónis-baqsha jáne mal azyǵy daqyldarynyń egis kólemderi ulǵaıtylady. Jazdyq daqyldardy ornalastyrý úshin aýdan boıynsha 28460 gektar súdiger kóterildi», deıdi aýdandyq aýyl sharýashylyǵy bóliminiń basshysy Qanat Temeshbaev.
Kóktemgi dala jumystaryn bastaǵandardyń biri – Aqbastaý aýyldyq okrýgi aýmaǵynda ornalasqan «Sharıpov» sharýa qojalyǵy.
«Aýa raıy da qolaıly bolyp tur. Arpa, bıdaı, júgeri egemiz dep josparlaǵan 100 gektar jerimizdi daıyndap jatyrmyz. Aldynda 220 gektar jerdi qyzylshaǵa daıyndadyq. О́tken jyly 100 gektar ekkenbiz. Jaqsy ónim aldyq. Bıyl qyzylsha egetin jerdiń kólemin ulǵaıttyq», deıdi agronom Farýh Iýnýsov.
Qazir egis alqabynda 5 traktor jer jyrtý ústinde. Sharýashylyq sý tapshylyǵyn boldyrmaý maqsatynda byltyr tamshylatyp sýarý ádisin qoldanǵan.
Aıta ketý kerek, sharýa qojalyqtarynda kóktemgi dala jumystaryn atqaratyn tehnıkalardy jóndeý aıaqtalǵan. Bıyl aýdan kóleminde paıdalanylatyn traktorlar sany 389 dana bolsa, onyń 364-i jóndelip, kóktemgi dala jumystaryna saqadaı saı.
