Oqıǵa • 12 Aqpan, 2021

Transplantolog rekordty jańartty

Qazaqstanda adam aǵzasyn almastyratyn kúrdeli ota jasaýdyń qas sheberi kim degende, eske birden transplantolog Abylaı Donbaı túsedi. Búginde Shymkent qalasyndaǵy №1 qalalyq klınıkalyq aýrýhanasynyń bas dárigeri bolyp qyzmet etetin Abylaı Donbaı bul salaǵa sanaly ǵumyryn arnaǵan.

Nurshat TО́KEN

Elimizde ǵana emes, TMD elderi ishinde aty jıi aıtylatyn transplantolog 11 jyldan beri medısına salasynda eńbek etip keledi. Tipti Eýropanyń úzdik medısınalyq uıymdarynan usynys tússe de bas tartqan bilgir maman týǵan qalasynda eńbek etýdi jón sanaǵan.

Tabany kúrekteı on jyldam astam ýaqyt aralyǵynda altyn qoldy hırýrg 600-den asa naýqasqa operasııa jasapty. Hırýrgııa baǵytyna ınnovasııalyq tehnologııalardy engizip, transplantologııa salasyn damytýǵa kúsh salǵan. О́zi basqaryp otyrǵan aýrýhanadaǵy bilikti mamandarmen birge Abylaı Ábdijapparuly 2019 jyly baýyr transplantasııasy otasyn 5 saǵat 48 mınýtta jasap, qazaqstandyq rekordty jańartqan.

Búgin ózi jumys isteıtin №1 qalalyq klınıkalyq aýrýhanada búırek jáne baýyr transplantasııasy operasııalaryn sátti isteýde. Sondaı-aq medısınalyq týrızmdi damytý maqsatynda 23 shetel azamatyna búırek transplantasııasyn jasaǵan. Sońǵy ret 166-shy búırek transplantasııa otasy sátti aıaqtalǵan.

«Búıregi nemese baýyry jaramaı qalyp, sharasyz halge túsken naýqastardyń kózinen sóngen úmitti baıqaımyn. Sondyqtan mundaı naýqastardyń ómirin aman alyp qalý úshin kúrdeli ota jasap, úmitterin qaıta jalǵaǵym keledi. Naýqastardyń otadan keıingi qýanyshty júzin kórip, odan ári shabyttana túsemin. О́zim basqaryp otyrǵan №1 qalalyq klınıkalyq aýrýhanada joǵary mamandandyrylǵan medısınalyq qyzmettiń sapasyn arttyrsam deımin. Alda josparym kóp. Eń basty mindetim – syrqattanǵan jandarǵa medısınalyq kómek kórsetý», deıdi Abylaı Donbaı.

ShYMKENT