Medısına tarıhynda bet transplantasııasy boıynsha birneshe ota jasalǵan. Degenmen, búginge deıin jaqsy nátıje bergeni tirkelmepti. Keıingi ota Fransııada jasalǵan. Alaıda naýqas kóp uzamaı qaıtys bolǵan.
Djo Dımeo Nıý-Iorktegi farmasevtıkalyq kompanııada laborant bolyp qyzmet etedi. 2018 jyly túngi aýysymnan shyǵyp, úıine bettegende qalǵyp ketip, apatqa ushyraǵan. Saldarynan Djonyń denesi kúıip, erin, qabaǵy men qolynan aıyryldy. Buǵan deıin de ol 20 plastıkalyq ota jasatypty. 2019 jyly ony Nıý-Iork ýnıversıtetiniń medısına ortalyǵyna jibergen. Arada bir jyl ótkende jaqsy jańalyq jetti.
«Mundaı syılyq ómirde bir-aq ret bolady. Donordyń otbasyna alǵys aıtamyn. Meniń ata-anam maǵan ekinshi múmkindik bergeni úshin dán rıza», dep aǵynan jaryldy.
«Ota tek naýqastyń keskinin jaqsartyp qoımaı, dene músheleriniń durys jumys isteýin qamtamasyz etýi kerek bolatyn. Ásirese qolynyń jumysy qatty alańdatty», dedi bet transplantasııasy baǵdarlamasynyń dırektory Edýardo Rodrıges.
Otadan keıin Djo 45 kún boıy qarqyndy terapııa bóliminde baqylaýda boldy. Taǵy eki aıyn aýrýhanada ótkizdi. Onda naýqasqa bárin qaıta bastaýǵa týra kelgen. Kózin ashýdan bastap, qolymen zat ustaýdy da jańadan úırenýge májbúr bolypty. Qazir Djo jattyǵý zalyna bara alady, tipti as daıyndaýǵa da kirisken.
Em-dom áli de jalǵasyp jatyr. Djo kúnine 5 saǵat fızıoterapııa alady. Sátti nátıjeni habarlaý úshin dárigerler birneshe aı ýaqyt kútken. «Biz onyń aǵzasy jańa múshelerin qabyldaǵanyn kúttik. Qazir ota jaqsy ótti dep aıta alamyz», deıdi dárigerler.
Daıyndaǵan
Svetlana ǴALYMJANQYZY,
«Egemen Qazaqstan»
