Qarjy • 12 Aqpan, 2021

Qarjy naryǵy qandaı «revolıýsııaǵa» tap boldy?

2020 jyly qolma-qol aqshasyz tólem buryn bolmaǵan deńgeıge kóterilip, vırtýaldy tranzaksııalar kólemi 2,6 ese ósken. Qazaqstan qarjygerler qaýymdastyǵy bul ahýaldy «qolma-qol aqshasyz tólem revolıýsııasy» dep baǵalaıdy.

Abaı QAZBEKULY

Qaýymdastyq dereginshe 2020 jyly qolma-qol aqshasyz jasalǵan saýda-sattyq kólemi 34,6 trln teńgeni quraǵan. Osylaısha, qolma-qol aqshasyz operasııa úlesi 45,5 paıyzdan 67,4 paıyzǵa deıin ulǵaıypty. Sonyń ishinde ınternet tranzaksııalar kóshtiń aldynda tur eken. Ol barlyq qolma-qol aqsha operasııalarynyń 80 paıyzyn ıelenedi. 2020 jyldyń qorytyndysy boıynsha aqshalaı mánde ınternet tranzaksııa kólemi 28,2 trln teńgege jetken.

«Byltyr aınalystaǵy nesıelik kartalar sany eki esege (5,3 – ten 10,9 mln birlikke deıin), al debıttik kartalar – 40 paıyzǵa (25,5-ten 35,6 mln birlikke deıin) ósti. Elimizdiń árbir 100 turǵynyna búginde 189 debıttik jáne 58 nesıelik karta tıesili. Qolma-qol aqshasyz tranzaksııalardyń tanymaldyǵy jyl saıyn ósip keledi: 2018 jyly olarǵa barlyq operasııalar kóleminiń – 29, 2019 jyly – 46, 2020 jyly 67 paıyzy tıesili boldy. Memleket áleýmettik baılanysty azaıtyp, halyq tabysynyń tómendeýin óteý úshin bank bólimshesine, saýda jáne servıs mekemelerine barýdy shekteıtin sharalar paketin qabyldady. Sonyń nátıjesinde qashyqtan qyzmet kórsetý damydy. Nátıjesinde júzdegen myń qazaqstandyqtarda esep aıyrysýdyń qolma-qol aqshasyz nysanyna kóshýge qosymsha yntalandyrýlar men múmkindikter paıda boldy. Bul qashyqtan qol jetimdi taýarlar men qyzmetterdi birinshi kezekte tańdaýdy anyqtaıtyn jańa tutyný mádenıetin qalyptastyrýǵa negiz boldy» delingen qaýymdastyq habarlamasynda.

Internet tranzaksııa ásirese, Almaty, Nur-Sultan jáne Shymkent qalalarynda tanymal. Qaýymdastyq atalǵan megapolısterde tólem kartasy men mobıldi qosymshany paıdalanýshylar kóp jáne halyqtyń qarjylyq saýattylyǵy joǵary deıdi. Muny janama túrdegi jan basyna shaqqandaǵy bank kartalarynyń sany da rastaıdy. Mysaly, Almatyda bir turǵynǵa 5,1 debıttik jáne 1,4 kredıttik kartadan kelse, Soltústik Qazaqstan oblysynda bir turǵynǵa 1,3 debıttik jáne 0,4 kredıttik karta tıesili.

Qarjygerler qaýymdastyǵynyń habarlaýynsha, taýarlar men qyzmetterdi onlaın tólem arqyly qoljetimdi etý Qazaqstannyń cashless-ekonomıkaǵa ótýin jedeldetedi. Bul óz kezeginde azamattarǵa qaýipsizdik pen jaılylyq syılap, qarjylyq operasııalar shyǵyndaryn optımızasııalaıdy, qarjy aınalymyn kúsheıtedi. Tıisinshe kóleńkeli ekonmıkanyń úlesin azaıtyp, salyqtyq ákimshilendirýdi jaqsartpaq.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz