«Qazaqstan Respýblıkasyndaǵy bankter jáne bank qyzmeti týraly» Qazaqstan Respýblıkasynyń Zańy 48-baby 1-tarmaǵynyń 7), 15) tarmaqshalaryna sáıkes:
- prýdensııalyq normatıvterdi jáne (nemese) saqtalýy mindetti basqa da normalar men lımıtterdi júıeli túrde (qatarynan kúntizbelik on eki aı ishinde úsh jáne odan kóp ret) buzý;
- qadaǵalap den qoıý sharalaryn júıeli túrde (qatarynan kúntizbelik on eki aı ishinde úsh jáne odan kóp ret) oryndamaý;
- ýákiletti organnyń qosymsha kapıtaldandyrý jónindegi talaptaryn Banktiń iri qatysýshysynyń oryndamaýy lısenzııadan aıyrýǵa negiz boldy.
Lısenzııadan aıyrý kúngi jaǵdaı boıynsha Bank aktıvteriniń mólsheri 45,4 mlrd teńge, nesıe portfeli - 45,0 mlrd teńge, onyń ishinde 31,6 mlrd teńge nemese banktiń nesıe portfeliniń 70,0%-y 90 kúnnen astam merzimi ótken jumys istemeıtin kredıtter. Lısenzııadan aıyrylǵan kúni «AsiaCredit Bank» ótimdi aktıvteriniń mólsheri 75 mln teńgeni qurady, bul rette oryndalmaǵan klıenttik tólemderdiń mólsheri 8,0 mlrd teńgeden asady.
2019 jylǵy qazannan bastap klıentter qarajatynyń ketýin óteý úshin ótimdi aktıvterdiń jetispeýshiliginen Bank retteýshi belgilegen prýdensııalyq normatıvterdi buza bastady. Osy kezeńnen bastap Agenttik tarapynan Bankke qatysty Banktiń jaǵdaıyn jaqsartýǵa baǵyttalǵan 14 qadaǵalap den qoıý sharasy qabyldandy jáne ákimshilik quqyq buzýshylyq týraly 73 hattama jasaldy.
2019 jylǵy qazanda Ulttyq Bank Banktiń jalǵyz aksıonerine
qatysty Bankti kapıtaldandyrý jónindegi talap túrinde májbúrleý sharasyn qoldandy, ol shara oryndalmady. 2020 jyly qanaǵattanarlyqsyz qarjylyq jaǵdaıynyń saqtalýyna baılanysty Agenttik Bankti qarjylyq jaǵdaıy ornyqsyz bankter sanatyna jatqyzyp, Bankten jáne onyń aksıonerinen Banktiń qarjylyq jaǵdaıyn jaqsartý jónindegi is-sharalar josparyn oryndaýdy talap etti.
Osy Jospardy oryndaý sheńberinde Bank aksıoneri 15,4 mlrd teńge mólsherinde ótimdilikpen qoldaýdy júzege asyrdy. 2020 jylǵy qańtardan bastap 2021 jylǵy aqpan aralyǵyndaǵy kezeńde aqshalaı óteý jáne aktıvterdi klıenttik depozıtterdi óteý esebine berý nátıjesinde Banktiń mindettemeleri 21,8 mlrd teńgege azaıdy. 2020 jylǵy qarashadan bastap 2021 jylǵy aqpan aralyǵynda Bank aksıoneriniń qarajaty esebinen áleýmettik mańyzy bar mekemeler (mektepter men aýrýhanalar) jáne «Biryńǵaı jınaqtaýshy zeınetaqy qory» AQ aldyndaǵy mindettemeler tolyǵymen óteldi. Banktiń qarjylyq jaǵdaıyn jaqsartý jónindegi is-sharalar josparynyń merzimi 2020 jylǵy 25 jeltoqsanda aıaqtaldy. Bank jáne onyń aksıoneri qabyldaǵan sharalar Banktiń qarjylyq jaǵdaıyn turaqtandyrýǵa ákelgen joq. Bank prýdensııalyq normatıvterdi buzýdy jalǵastyrýda jáne Bank klıentteri aldyndaǵy tólemder men aýdarymdar boıynsha mindettemelerdi oryndamaıdy. Banktiń qosymsha provızııalar qalyptastyrý úshin qajetti menshikti kapıtal tapshylyǵy 19 mlrd teńgeni quraıdy.
«AsiaCredit Bank» AQ-ta 2021 jylǵy 1 aqpandaǵy jaǵdaı boıynsha
23 174 jeke tulǵanyń depozıtteri bar, olardyń jıyntyq qaldyǵy shamamen 19 mlrd teńge. Bank salymshylarynyń, jeke tulǵalardyń 97,7%-nyń depozıtteri QDKQ kepildigimen tolyq kólemde óteledi.
Agenttik Tóraǵasynyń 2021 jylǵy 11 aqpandaǵy №51 buıryǵymen ýaqytsha ákimshilik taǵaıyndaldy, oǵan Banktiń barlyq basqarý organdarynyń ókilettikteri ótti. Ýaqytsha ákimshilik Banktiń taratý komıssııasy taǵaıyndalǵanǵa deıin jumys isteıtin bolady. Ýaqytsha ákimshilik jetekshisi bolyp Agenttiktiń qyzmetkeri Erlan Sársenbekuly taǵaıyndaldy.
2021 jylǵy 12 aqpannan bastap QR zańnamasynda kózdelgen jaǵdaılardy qospaǵanda, klıentterdiń jáne Banktiń óziniń banktik shottary boıynsha barlyq operasııa toqtatyldy. Agenttik Banktiń qyzmetin májbúrlep toqtatý (taratý) týraly ótinishpen sotqa belgilengen tártippen júginedi.
