Elimizde ótken baıraqty dodaǵa Qazaqstan sportshylarynan bólek, Reseı, Qyrǵyzstan jáne Marokkodan kelgen 70-ten astam sportshy qatysty.
Jyl saıyn dástúrli túrde uıymdastyrylatyn Shyǵys Eýropa Kýbogy jarysy Halyqaralyq shańǵy federasııasynyń qoldaýymen 7 kezeń boıy ótedi. Atalǵan týrnırde Qazaqstan, Belarýs, Reseı jáne Ýkraına sekildi elderdiń sportshylaryna halyqaralyq reıtıngte upaı ıelenip qana qoımaı, álem kýbogyna qosymsha joldamaǵa ıe bolady. Al ózge eldiń sportshylary bul jarystarǵa jalpy reıtıng upaı jınaý úshin qatysady. Shyǵys Eýropa Kýbogyn Qazaqstan osymen ekinshi ret qabyldap otyr. Buǵan deıin 2019 jyldyń qarasha aıynda osy bedeldi jarys Shýchınsk qalasyndaǵy Ulttyq shańǵy sporty ortalyǵynda ótkizilgen bolatyn.
Talǵar qalasy qabyldaǵan bıylǵy jarystyń alǵashqy kúninde sportshylar klassıkalyq stıldegi sprınt boıynsha synǵa tústi. Áıelder arasynda ótken jarysta otandasymyz Anna Shevchenko reseılik sportshy Lılııa Vasılevaǵa ese jiberip, mereıli ekinshi orynǵa ıe bolady. Qola júldeni taǵy bir reseılik sportshy Anastasııa Moskalenko qanjyǵasyna baılady. Al erler arasyndaǵy jarysta alǵashqy úsh oryndy reseılik sportshylar ıelendi.
Ekinshi jarys kúnindegi klassıkalyq stıldegi jeke saıysynda da reseılik sportshylar dara shyqty. Áıelder arasynda Lılııa Vasıleva bas júldeni oljalasa, erler arasynda Andreı Larkovqa teń keler qarsylas tabylmady. Dese de áıelder arasyndaǵy básekede kúmis jáne qola júlde otandastarymyzǵa buıyrdy. Anna Shevchenko máre syzyǵyn ekinshi, Tamara Ebel úshinshi bolyp kesti.
О́kinishke qaraı, sońǵy jarys kúninde erkin stıldegi mass-start jarysynda da jerlesterimiz jeńis tuǵyryna kóterile almady. Bul joly da altyn júlde Reseı sportshylarynyń qanjyǵasynda ketti. Tek áıelder arasyndaǵy dodada Anna Shevchenko ekinshi oryn ıelenip, Qazaqstan qorjynyna kezekti kúmis júlde saldy. Osylaısha úsh kúnge sozylǵan halyqaralyq týrnırdiń qorytyndysy boıynsha jalpykomandalyq esepte Reseı sportshylary úzdik atandy.
