Senat komıtetiniń tóraǵasy óziniń kirispe sózinde penıtensıarlyq júıede sońǵy jyldary birqatar oń ózgerister baıqalyp otyrǵanyn, sonymen qatar ınfraqurylymdy damytýǵa, sottalǵandardy jumyspen qamtýdy qamtamasyz etýge jáne túrmedegi óndiristiń básekege qabilettiligine, medısınalyq qyzmet kórsetýge baılanysty birqatar ózekti problemalar áli de sheshilmeı kele jatqanyn atap ótti.
El Prezıdenti "Jańa jaǵdaıdaǵy Qazaqstan: is-qımyl kezeńi" atty Qazaqstan halqyna Joldaýynda penıtensıarlyq mekemelerde jappaı beınebaqylaý ornatý qajettigin atap ótken bolatyn. Senatorlardyń talqysyna salynǵan máselelerdiń ishinde osy taqyryp ta boldy.
"Uıymdastyrýshylyq jáne zańnamalyq sıpattaǵy qabyldanyp jatqan júıeli sharalar túrmedegilerdiń sanyn edáýir azaıtýǵa, jazalardy oryndaý júıesin izgilendirý úshin quqyqtyq jaǵdaılardy qamtamasyz etýge múmkindik berdi", - dedi ishki ister mınıstri E.Turǵymbaev.
Búgingi tańda 64 túzeý mekemesinde 25 827 sottalǵan jazasyn ótep jatyr, 16 tergeý ızolıatorynda 5 805 adam qamaýda otyr.
Túrmedegiler sanynyń kóp bolýyna baılanysty Qazaqstan álemdegi túrme reıtıngi boıynsha 100-shi oryn alady (táýelsizdik qarsańynda Qazaqstan 100 myńǵa jýyq tutqyn sany boıynsha AQSh pen Reseıden keıin 3-shi orynǵa shyqqan bolatyn).
Komıtet depýtattary otyrys barysynda IIM Qylmystyq-atqarý júıesi komıtetiniń tóraǵasy J.Eshmaǵambetovtyń elimizdegi penıtensıarlyq júıeniń jaı-kúıi týraly baıandamasyn tyńdady. QAJK basshysy óz sózinde penıtensıarlyq ınfraqurylymdy jańǵyrtý jáne jańa túrmeler salý jónindegi qabyldanyp jatqan sharalarǵa qaramastan kóptegen túzeý mekemelerindegi tozyǵy jetken ǵımarattar men qurylystar áli de problema bolyp otyrǵanyn aıta kelip, ony sheshý úshin bıýdjet qarjysyn bólý qajet ekenine depýtattardyń nazaryn aýdardy.
"Qazir kamerada ustaıtyn 9 mekeme jumys isteıdi, onda 4 myńǵa jýyq sottalǵandar bar. Jumys istep turǵan QAJ mekemeleriniń negizgi qorynda ótken ǵasyrdyń 30-70-shi jyldarynda baraq úlgisinde salynǵan ǵımarattar men qurylystar bolyp otyr. 42 túzeý mekemesin qaıta qurý qajet", - dedi QAJK tóraǵasy.
Otyrysqa qatysýshylar, onyń ishinde Bas prokýratýra men "Eńbek" RMK ókilderi memlekettik-jekeshelik áriptestik aıasynda jeke ınvestorlardyń qarajatyn tartý, onyń ishinde túzeý mekemeleriniń óndiristik áleýetin damytý, jappaı beınebaqylaý ornatý múmkindigin qamtamasyz etýdi talqylady. Sondaı-aq sottalǵandardy jáne tergeý-qamaýǵa alynǵan adamdardy medısınalyq turǵyda qamtamasyz etý fýnksııalaryn Ishki ister mınıstrliginen alyp Densaýlyq saqtaý mınıstrliginiń qaramaǵyna kezeń-kezeńimen berý máselesi de talqylaýdyń ózekti taqyryby boldy.
Komıtet tóraǵasy Vladımır Volkov otyrysty qorytyndylaı kelip, Qazaqstan BUU-nyń adam quqyqtaryn qorǵaý salasyndaǵy birqatar halyqaralyq qujattaryna qosylǵanyn, osy turǵyda tutqyndardy ustaý jaǵdaılaryn qarym-qatynastyń eń tómengi standarttaryna jaqyndatý jóninde qabyldanǵan mindettemelerdiń oryndalýyn qamtamasyz etý asa mańyzdy ekenin atap ótti. Odan basqa, ustaý jaǵdaılaryn qamtamasyz etý, sottalǵandardyń negizgi quqyqtary men bostandyqtaryn saqtaý, olardy eńbekpen jáne suranysqa ıe kásibı daǵdylarmen qamtamasyz etý erkindikke shyqqan azamattarǵa bosatylǵannan keıin qoǵamǵa qaıtadan tolyqqandy kirigýge múmkindik beredi.
Otyrys nátıjesi boıynsha qorytyndy daıyndaldy, ol Úkimet pen memlekettik organdarǵa jiberiletin bolady.
