«Degenmen, uly oıshyldyń ósıetterin dáripteý jolynda bir jylmen shektelip qalýǵa bolmaıtyny túsinikti. О́ıtkeni bizdiń ulttyq bolmysymyz ben dúnıetanymymyzdyń qalyptasýynda hakim Abaıdyń róli erekshe. Biz boıymyzdy da, oıymyzdy da Abaı sózderine qarap túzeımiz. Sondyqtan aqyn murasyn dáripteý, ásirese, ony óskeleń urpaqtyń sanasyna sińirý qashanda mańyzdy.
Osy oraıda elordamyzdaǵy Mýzykalyq jas kórermen teatrynyń ıgilikti isin erekshe atap ótkim keledi. Taıaýda atalǵan óner ordasynda «Abaı-Toǵjan» qoıylymyn tamashalap, keremet rýhanı keshtiń kýási boldym. Buǵan deıin kóbine aqynnyń ulǵaıǵan shaǵyn kórip kelsek, bul joly biz jas Abaıdy kórdik. Onyń kemeńger bolyp qalyptasýynyń alǵashqy kezeńderine úńildik. Aqyn lırıkasynyń bastaýyna nazar aýdardyq. Sol sebepti, atalǵan spektakldi Abaıtaný ilimine tyń serpin bergen týyndy dep qabyldaımyn.
Shyn máninde, oıshyldyń ómir joly – kúreske toly kúrdeli jol. Ony Abaı men Toǵjannyń mahabbatynan da ańǵarý qıyn emes. Sondaı kezeńder aqyn fılosofııasynyń qalyptasýyna úlken áserin tıgizgeni sózsiz. Qoıylymda sonyń bári erekshe tapqyrlyqpen sýrettelgen», deıdi Máýlen Áshimbaev.
Senat tóraǵasy Mýzykalyq jas kórermen teatrynyń ashylǵanyna kóp bola qoımasa da birshama qoıylymdardy abyroımen sahnalap shyqqanyn atap ótti. Olardyń ishinde Muqaǵalıdiń, Shámshiniń shyǵarmashylyǵyna arnalǵan qoıylymdar da bar. Budan bólek ol teatr ártisteriniń sheberligine de toqtalyp ótti.
«Osy rette teatrdyń akterler quramyna da toqtala ketken jón. Olardyń qatarynda Samal Eslıamova, Aıan Otepbergen , Asylhan Tólepov sııaqty belgili daryn ıelerimen birge jas talanttar da bar. О́nersúıer qaýymǵa ǵajaıyp kóńil-kúı syılap júrgen teatr akterlerine jáne osy ujymnyń basshysy, kásibı rejısser, sheber uıymdastyrýshy Ashat Maemırov aıryqsha alǵysymyzdy bildiremiz.
Teatr – klassıkalyq óner. Al, klassıka qashanda bıik turady. Sol sebepti, jas teatrdyń ǵumyry uzaq bolaryna senemiz jáne soǵan tilekshimiz. Alar asýlaryńyz kóp bolsyn. Indetten tezirek qutylyp, zal kórermenge lyq tolatyn kún týsyn. Qazaq óneri jasaı bersin», delingen M. Áshimbaevtyń jazbasynda.
