Naýryzdyń altysy men jetisi kúnderi kórermen qaýym elimizdiń úzdik balet teatrlary solıstteriniń oryndaýynda klassıkalyq horeografııa jaýharlarymen qatar, qazirgi zamanǵy ózekti eksperımenttermen de tanysa alady.
«Astana Balet» teatrynyń sahnasynda óner kórsetetinder: Farhad Bórıev, Qazbek Ahmedııarov, Tatıana Ten, Aıjan Muqatova, Súndet Sultanov («Astana Balet» teatrynyń jetekshi solıstteri), Bahtııar Adamjan («Astana Opera» teatrynyń premeri), Janel Tókeeva, Málıka Elshibaeva, Rahym Daıyrov (UAOBT jetekshi solıstteri) jáne t.b.
«Gala-konserttiń baǵdarlamasy, qatysatyn ártisteriń quramy óte muqııat tańdalady. Bul úzdiksiz shyǵarmashylyq úrdis bolǵandyqtan, baǵdarlamanyń mazmunyn, oǵan qatysatyn ártisterdiń esimin sońǵy sátke deıin qupııa ustaımyz. Árıne, teatrymyzdyń sahnasynda elimizdegi balet óneriniń sańlaqtary óner kórsetetini biz úshin zor maqtanysh. Kórermenimiz úshin, bul — daryndy juldyzdardy kózben kórý múmkindigi ǵana emes, san-alýan spektaklderdiń úzindilerin tamashalaý baqyty, der edim», dep atap ótti, «Astana Balet» teatrynyń kórkemdik jetekshisi Nurlan Kanetov.
Atalǵan is-shara Mádenıet jáne sport mınıstrliginiń qoldaýymen, el Táýelsizdiginiń 30 jyldyǵy aıasynda ótedi. Esterińizge sala keteıik, naýryz aıynda elordalyq teatr taǵy eki baǵdarlamany usynbaqshy: 12-13 naýryzda «Valpýrgıev túni» jáne «GAIA» bir aktili spektaklderi, al, Naýryz meıramyna oraı, 20-naýryzda «Ulttyq balet keshi» ótedi.
