Qazaqstannyń ekologııa, geologııa jáne tabıǵı resýrstar mınıstri Maǵzum Myrzaǵalıev seısenbi kúni «ArselorMıttal» kompanııasynyń vıse-prezıdenti Vıjaı Goıal myrzamen kezdesti.
Kezdesý barysynda taraptar kompanııa ótkizetin tabıǵatty qorǵaý is-sharalaryn, sondaı-aq emıssııalardyń asyp ketýi boıynsha jaqynda oryn alǵan oqıǵany talqylady.
Áńgime barysynda mınıstr Temirtaý atmosferasynyń lastaný deńgeıi búgingi tańda eldiń basty ekologııalyq problemalarynyń biri bolyp tabylatynyn atap ótti.
M.Myrzaǵalıevtiń málimetinshe, jyl saıyn «Arselor Mıttal Temirtaý» AQ metallýrgııalyq kesheninen atmosferalyq aýaǵa 230 myń tonnadan astam lastaýshy zattar shyǵarylady, bul qalanyń árbir turǵynyna (balalar men áıelderdi qosa alǵanda) shamamen 11 tonna lastaýshy zattardan keledi.
Ekologııa mınıstrliginiń basshysy kompanııa júzege asyryp jatqan tabıǵatty qorǵaý is-sharalaryn tıimsiz dep atady.
«Kásiporynda tek qaǵaz júzinde jáne «kóz boıaýshylyq» úshin jumys isteıtin tıimdiligi az tabıǵat qorǵaý sharalary engizildi», - dep atap ótti mınıstr.
Sońǵy 5 jylda kásiporyn tabıǵatty qorǵaý is-sharalaryna 28 mlrd.teńge (67 mln. dollar) jumsady, al ekologııalyq tıimdilik shyǵaryndylardyń 190 tonna nemese «Arselor Mıttal Temirtaý» naqty shyǵaryndylarynyń 0,08% - na tómendeýin ǵana qurady.
2019 jyly kompanııa 2019-2024 jyldar ishinde shyǵaryndylar kólemin 60 myń tonnaǵa azaıtý mindetin ózine aldy.
«Alaıda, kásiporyn áli kúnge deıin ózine alǵan mindettemelerdi oryndaý boıynsha sharalar qabyldamady», - dep atap ótti M.Myrzaǵalıev.
Temirtaýdyń ekologııalyq ahýalyn eskere otyryp, Ekologııa mınıstrliginiń basshysy kompanııa basshylyǵynyń aldyna eń ozyq qoljetimdi tehnologııalarǵa kóshe otyryp, shyǵaryndylar kólemin taıaýdaǵy 4 jylda keminde 30%-ǵa tómendete otyryp, óndiristi tolyq rekonstrýksııalaý jáne jańǵyrtý týraly másele qoıdy.
Sondaı-aq, mınıstr naqty ýaqyt rejıminde derekterdi bere otyryp, emıssııalar monıtorınginiń avtomattandyrylǵan júıesin engizý qajettigin atap ótti.
Qala ekologııasynyń jaı-kúıin jaqsartý sharalarynyń qatarynda M.Myrzaǵalıev kompanııanyń Temirtaý men oǵan irgeles aýmaqta (500 myń aǵash otyrǵyzý) «jasyl beldeý» qurý jónindegi mindettemesin eske saldy.
