«Qurmetti áriptester, barshańyzdy bilim salasyna bıznes emes, áleýmettik jaýapkershilik retinde qaraýǵa shaqyramyn. Endi burynǵydaı memlekettik úlgidegi dıplomdar bolmaıdy. Sondyqtan árqaısysymyz el aldynda, stýdentter men ata-analar aldynda bilim sapasy úshin jaýaptymyz. Bizdiń basty klıentimiz – stýdentter emes, jumys berýshiler. Qazir bilim alyp jatqan stýdentter keıin bizdiń jáne balalarymyzdyń bolashaǵyna yqpal etedi»,- dep atap ótti ol rektorlar kezdesýinde.
Talǵat Nárikbaevtyń aıtýynsha, eger ýnıversıtet stýdentten oqý aqysyn ala otyra eńbek naryǵynda suranysqa ıe sapaly bilim bermese, ol alaıaqtyq dep esepteledi.
«Tutynýshy ózi kútkendeı sapaly bilim ala almaǵan jaǵdaı da kezdesýi múmkin. Kásibı quzyrettiliginiń tómendiginen jumyssyz qalǵan stýdentter nemese ata-analary oqýǵa jumsalǵan aqshany qaıtarýdy talap etip, ýnıversıtetti sotqa bere bastaýy da múmkin», - deıdi ol.
Sondaı-aq Talǵat Nárikbaev oqý prosesi men bıznes-prosesterdi sıfrlandyrý árdaıym aqshaǵa tirele bermeıtinin atap ótti. Ýnıversıtettiń ishinde qandaı problemalar bar ekenin, nátıjeleri qaı kezeńde «toqtap qalatynyn» nemese burmalanatynyn túsiný úshin sapaly jáne tereń aýdıt júrgizip, prosesterge qansha ýaqyt jumsalatynyn anyqtaý qajet.
«Ádette, joǵary oqý oryndary ashyqtyqty qalamaǵan kezde akademııalyq prosesterdi sıfrlandyrýǵa qarsy bolady. Sebebi bilim sapasyn baǵalaýdyń, ótinishterdi qaraýdyń jáne sheshimderdi qabyldaýdyń árbir kezeńi kópshilikke kórinip turady jáne saqtalyp qalady», - dedi Talǵat Nárikbaev.
Atap óteıik, shara QR Bilim jáne ǵylym mınıstrliginiń Feısbýktegi resmı paraqshasynda tikeleı efırde kórsetildi.
