Memleket basshysynyń 2020 jylǵy 1 qyrkúıektegi Qazaqstan halqyna arnaǵan Joldaýyn iske asyrý aıasynda oǵan «QazAgro» UBH» AQ-ny qosý jolymen «Báıterek» UBH» AQ-ny qaıta uıymdastyrý jumystary júrgizildi.
Osyǵan baılanysty «Báıterek» holdınginiń Jarǵysynda kompanııa qyzmetiniń negizgi maqsattary men máni elimizdiń agroónerkásiptik keshenin damytýdy yntalandyrý jónindegi memlekettik saıasatty iske asyrýmen tolyqtyryldy.
Otyrysqa qatysýshylar holdıngtiń oblıgasııalaryn shyǵarý arqyly 10 jylda 50 mlrd teńge kóleminde qosymsha qarjy tartý týraly sheshim qabyldady. Alynǵan qarajat el kásiporyndarynyń negizgi quraldaryn lızıngtik qarjylandyrý úshin «О́nerkásipti damytý qory» AQ-ǵa jiberiletin bolady. 2020 jyly «Báıterek» holdınginiń enshiles uıymdary jalpy somasy 1 trln 16,9 mlrd teńgege ekonomıkanyń shıkizattyq emes salalarynyń kásiporyndaryna qoldaý kórsetti.
О́tken jylmen salystyrǵanda qarjylyq qoldaý kólemi 177,7 mlrd teńgege nemese 21%-ǵa ulǵaıdy. Ekonomıkanyń jeke sektoryn damytý maqsatynda 2020 jyly 799,8 mlrd teńge somasyna 20 myńnan astam kásipkerlik sýbektilerine qoldaý kórsetildi.
Sondaı-aq otyrysta 2019-2020 jyldarǵa arnalǵan Korporatıvtik basqarýdy jetildirý jónindegi is-sharalar josparyn oryndaý nátıjeleri, korporatıvtik basqarýdy táýelsiz baǵalaý nátıjeleri qaraldy. «Báıterek» UBH» AQ-nyń 2020 jylǵy tórtinshi toqsandaǵy táýekelderi jónindegi esebi jáne Ishki aýdıt qyzmetiniń sáıkes kezeńdegi esebi bekitildi.