Qazaqstan halqy bıyl altynshy jyl qatarynan Alǵys aıtý kúnin atap ótedi. Taǵdyrdyń tálkegimen elimizge qonys aýdarǵan túrli etnos ókilderin qazaq halqy qushaq jaıa qarsy alyp, aýyrtpalyq ataýlyny birge kóterdi. Bul kún - qıyn-qystaý kezeńderde qýanysh-qaıǵyny bólisip, pana bola bilgen qazaq halqyna ózge ult ókilderiniń alǵys aıtatyn kúni.
2016 jyly 14 qańtarda QR Tuńǵysh Prezıdenti - Elbasy Nursultan Nazarbaev 1 naýryz - Alǵys aıtý kúni dep jarııalanǵany týraly jarlyqqa qol qoıdy. Dál osy 1 naýryz kúni elimizde Qazaqstan halqy Asssambleıasy qurylǵan bolatyn. Memleket basshysy Nursultan Nazarbaev 2015 jyldyń 22 sáýirinde Assambleıanyń XXII sessııasynda Alǵys aıtý kúnin belgileýge ne túrtki bolǵanyn aıtqan bolatyn.
«Olardy poıyz vagondarynan japan dalaǵa túsirip ketti. Ol kezderi munda tek qazaqtar ómir súrdi. Sondyqtan olar qabyl alyp, kómek kórsetti. Qıyn ýaqyttardy bastan ótkerip júrgen qazaq otbasylary balshyq úılerine kirgizip, qabyldady. Bizdiń januıamyz da úsh balasy bar erli-zaıyptyny qabyldady. Qazaqstan halqy Assambleıasynyń qurylǵan kúnin - 1 naýryzdy jyl saıyn barlyq etnostardyń bir-birine meıirimdilik kórsetetin, túrli halyqtardy týǵanyndaı qabyldaǵan qazaqtarǵa Alǵys aıtý kúni dep atap ótken durys bolar edi. Bul bizdi odan ári jaqyndastyrar edi. Bul kún barlyq qazaqstandyqtardyń bir-birine meıirim, dostastyq jáne mahabbat tanytý merekesi bola alady», dedi Nursultan Nazarbaev.
