Tergeý derekterine sáıkes, aıyptalýshy Sultan Sársemálıev óz áıeliniń týystaryn – qaıyn atasyn, qaıyn enesin, sondaı-aq áıeliniń aǵasy men ápkesin óltirdi degen kúdikke ilingen. Alǵashqy ashyq sot otyrysy búgin saǵat 11:00-ge belgilenip, isti sýdıa Zarema Hamıdýllına qaraıdy.
Qylmys qoǵamda úlken rezonans týdyrǵan bolatyn. Buǵan deıin, 2025 jyldyń jeltoqsanynda marqumdardyń týysy polısııaǵa júginip, Qyzylqoǵa aýdanyndaǵy Jangeldın aýylynda turatyn aǵasy men onyń otbasy habarsyz ketkenin aıtqan.
Tergeý barysynda olardyń qarasha aıynda úıden shyǵyp ketkennen keıin qaıta oralmaǵany anyqtaldy. Keıin olardyń telefon sıgnaldary Qazaqstannyń ártúrli óńirlerinen, sońǵy ret Shymkent qalasynan tirkelgen.
2026 jyldyń qańtarynda erli-zaıyptylardyń máıitteri tabylsa, keıinirek taǵy eki adamnyń máıiti Atyraý mańyndaǵy Geolog yqshamaýdanynan anyqtalǵan.
Tergeý málimetinshe, kúdikti otbasy múshelerimen birge úı jaldap turǵan. Oqıǵaǵa qatysty kúdikti halyqaralyq izdeý jarııalanyp, ol keıin Indonezııada ustalǵan.
Polısııa deregine sáıkes, is «adam óltirý» jáne «urlyq» baptary boıynsha tergelip jatyr. Tergeý aıaqtalyp, is sotqa joldanǵan. Kúdikti óz kinásin moıyndaǵan jáne qazirgi ýaqytta tergeý ızolıatorynda otyr.
