Onyń aıtýynsha, búginde Syr boıyna baý-baqsha tuqymdary men kóshetter, qalamshalar kórshiles oblystardan jetkizilip otyr.
– Bul ortalyqty ashýdaǵy maqsat – oblys halqyn sapaly tuqymdarmen qamtamasyz etý, aımaq turǵyndarynyń eginshilikke degen qyzyǵýshylyǵyn oıatý. Buryn jemis-jıdek pen kókónistiń neshe túri egilgen óńirde baqsha sharýashylyǵyn órkendetýdi kózdeımiz. Bul úshin tuqymnyń sapasyna erekshe mán berip otyrmyz. О́ndirýshilermen tyǵyz baılanys ornatyp, tuqymdardy orıgınatorlardan alýdy jolǵa qoıdyq. Tuqymdy shet eldik kompanııalarmen qosa kórshiles Shymkent qalasynan, sondaı-aq Jańaqorǵan aýdanyndaǵy «Syr tabıǵaty» tuqym baǵynan da alyp otyrmyz. Jańaqorǵandyq áriptesterimizdiń jergilikti jemis jáne sándik ekpe aǵashtaryn oblys ortalyǵyna jetkizemiz, – deıdi «Jasa Agro» ortalyǵynyń basshysy Samalbek Qosanov.
Ortalyqta baý-baqshany tamshylatyp sýarý úshin qajetti quraldar, tyńaıtqyshtar, jylyjaıǵa kerekti jabdyqtarǵa deıin bar. Kásipker ortalyq janynan jylyjaı da salyp qoıǵan. Bıyl túrli kókónisterdiń 50 myń kóshetin naryqqa shyǵarmaq, aldaǵy ýaqytta onyń kólemin 150-200 myńǵa deıin arttyrady. Kóshetterden keıin jylyjaıǵa qııar egiledi eken.
Kásipker-ǵalym ortalyqtan tuqym, baý-baqshaǵa qajetti ózge de zattardy alǵandarǵa túrli keńes berip, ónimdi odan ári jetildirýge kómek kórsetetinin jetkizdi.
Budan bólek aldaǵy ýaqytta Jumyspen qamtý ortalyǵymen tyǵyz baılanys ornatyp, jumyssyz júrgen jandardy baǵbandyqtyń qyr-syryna úıretýdi, olarǵa biliktiligin aıqyndaıtyn sertıfıkattar berýdi kózdep otyr.
Qyzylorda oblysy kásipkerler palatasy dırektorynyń orynbasary Pirmuhammed Syzdyqov birneshe jyl buryn óńir dıqandary úshin baý-baqsha ónimderine sýbsıdııa alý úlken máselege aınalǵanyn aıtady. Palata oblystyq aýyl sharýashylyǵy basqarmasymen birlese otyryp, bul problemany mınıstrlikke jetkizgen. Osynyń nátıjesinde aımaq turǵyndary 2019 jyldan beri jemis-jıdek, baý-baqsha ósirgeni úshin memlekettik qoldaýǵa ıe bolyp keledi.
– Búgingi ashylǵan ortalyq óńirde jergilikti ónimderdiń qataryn arttyrýǵa, egistik alqaptardy ártaraptandyrýǵa úlken úles qosady dep senemiz. Kásipkerler palatasy bul bastamany qoldaıdy, alda da kómek kórsetemiz, – dedi P.Syzdyqov.
Qyzylorda oblysy
