Uly Jibek jolynyń boıynda ornalasqan Orta Azııadaǵy eń kóne qalanyń jańa tarıhı beınesin aıshyqtaıtyn qaladaǵy eń aýqymdy jobalardyń biri - «Shymkent City». Kólemi 427 gektardy quraıtyn qalashyq 70 myńǵa jýyq turǵynǵa eseptelgen. Onda 12 turǵyn úı kesheni salynýda. Ondaǵy qurylysy júrip jatqan turǵyn úıdiń jalpy sharshy metri 1,7 mln quraıdy. Bul turǵyn úı qurylysyna 0,5 trln. teńge ınvestısııa tartylǵan. Atalǵan jobanyń júzege asyrylýy týraly «Shymkent» ÁKK UK AQ Basqarma tóraǵasy Baýyrjan Kankın aıtyp ótti.
Onyń aıtýynsha, baspanalar qurylysynyń ortalyǵynda kólemi 40 ga bolatyn saıabaq alańy ornalaspaq. Al memleket qarjysy esebinen 24,5 ga quraıtyn 1-shi oramda jalpy quny 27 mlrd teńgege 43 nysannyń qurylysy josparlanǵan. Onyń 39-y - kópqabatty turǵyn úı. Búgingi tańda qalashyqta 25 nysan paıdalanýǵa berilgen, 23 kópqabatty turǵyn úıdegi 1290 páter el ıgiliginde deıdi.
«Búginde «Shymkent City» qalashyǵynda 1048 páterli 16 kredıttik turǵyn úı men 2 ınjenerlik ınfraqurylym nysany men jalpy uzyndyǵy 13,8 shaqyrymdy quraıtyn 7 kósheniń qurylysy jáne 1200 oryndyq jańa mekteptiń qurylysy aıaqtalǵan. Endi sol mańnan balabaqsha salynady. Qajetti ınjenerlik-ınfraqurylym tartylǵan. Munda óz aldyna modýldi jylytý qazandyǵy bar. Ol mekemeler men turǵyn úılerdi jyl on eki aı ystyq sýmen qamtıdy»,-deıdi B.Kankın.
Qazirgi tańda «Shymkent City»-de fransýz sáýlet stılinde 16 qabatty turǵyn úıler boı kóterýde. Turǵyn úı kesheni aýmaǵynda zamanaýı sport alańdary, avtoturaq bar.
Sonymen qatar, ol «Shymsıtı» shaǵyn aýdanynyń qurylysy kesheýildep jatqandyǵy týraly oıǵa kelispeıtinin aıtyp, qaladaǵy iri jobalardyń biri bolǵandyqtan tıisti jumystar kezeń-kezeńimen júzege asyrylyp, qalashyqtyń aýmaǵy tolyǵymen ıgerilgenin, onda bos jerdiń joq ekenin jetkizdi.
