Qazaqstannyń batys óńirinde ejelden erekshe atalyp ótetin kórisý merekesi bıyl da 14 naýryzda sanıtarııa-epıdemıologııa talaptaryn saqtaı otyryp atalyp ótti. Bir qýanarlyǵy bul mereke buryn óńirlik deńgeıde bolsa, jyl ótken saıyn jalpyhalyqtyq sıpat alyp bara jatyr.
Kóne kúntizbe boıynsha hamal aıy bastalatyn bul kúni Hadısha Bókeeva atyndaǵy Batys Qazaqstan oblystyq qazaq drama teatrynda ótken sharada óńir basshysy Ǵalı Esqalıev oblys turǵyndaryn aıtýly merekemen quttyqtady.
«Naýryz kelisimen Uly dalamyz kórkeıip, jańǵyryp, keremet keıipke enedi. Halqymyz «kúz jaýynymen sándi, qys qarymen árli» dep beker aıtpaǵan. Qazaq erte kóktemde qar kóp bolsa, keler jylda molshylyq bolady dep eseptegen. Qysty artqa tastap, qańqyldap qazdar keletin, jan bitken jańǵyryp, jasanyp jaqsy bir kúıge enetin kóktemniń ǵajap merekesi – Kórisý merekesi de kelip jetti. Bul ejelden kele jatqan mereke. Halyqtyń ata kásibi mal sharýashylyǵymen baılanysty bolǵandyqtan, kópten birin biri kórmegen aǵaıyn-týys, baýyrlar qystan aman shyǵyp, saǵynysyp bas qosatyn úlken mańyzy bar meıram. Sondyqtan ata-babamyzdan qalǵan merekeni toılaý bizge buıyrǵan baqyt.
Qadirli el aǵalary, aq jaýlyqty apalar, sizderdi kóktemniń tamasha merekesi – Kórisý kúnimen shyn júrekten quttyqtaımyn. Sizderdiń aq batalaryńyzdan, rııasyz kóńilderińizden biz rýh pen kúsh-qýat alamyz. Árıne, ótken jylǵa ókpe joq degenmen, ótken jyl eldegi indetke baılanysty bárimizge de ońaı tıgen joq. Degenmen jańa jylda árqaısymyz bir-birimizge qoldaý-demeý kórsetip, janashyr bop júrsek biz kez kelgen qıyndyqtardy eńseremiz», dedi Ǵalı Esqalıev.
Saqtyq sharalary barynsha saqtalyp ótken teatrdaǵy sharada ardager kórkemónerpazdardan quralǵan «Aǵalar áýeni» toby men «Áje sálemi» ansambli, oblystyq fılarmonııanyń «Oral sazy» folklorlyq ansambli, «Nazerke», «Saltanat» bı ansamblderi óner kórsetip, dástúrli kórisý saltynan kórinis kórsetildi. Ájeler shashý shashyp, jas kelinder sálem salyp, qonaqtarǵa kóje men baýyrsaq usyndy. Úlkender jaǵy jınalǵandarǵa aq batasyn berdi.
Bul kúni Batys Qazaqstan oblysynyń ár aýdanynda, Oral qalasynyń ár jerinde túrli sharalar bolyp jatty. Jastar mádenıet úıiniń jáne mádenı-aǵartý birlestiginiń ónerpazdary, qalalyq kitaphanalar júıesiniń qyzmetkerleri, oblystyq resýrstyq ortalyqtyń mamandary Oral qalasyndaǵy qoǵamdyq kólikterde án shashý shashyp, izgi tilekterin joldap, vıktorınalyq suraqtar qoıyp, salt-dástúr týraly málimetter berdi. Suraqtardyń jaýabyn dál tapqan jolaýshylar túrli syılyqqa ıe boldy.
Bul kúni Qazaqstannyń jalpyulttyq kıeli nysandary qataryna engen Dádem ata – Jumaǵazy qaziret zııaratynda da as berilip, naýryz kóje taratyldy. Jeti jyldan beri ótip kele jatqan dástúrli shara bıyl karantın talaptaryna saı uıymdastyryldy. Jınalǵandar aldynda fılologııa ǵylymdarynyń doktory, professor Murat Sabyr, ólketanýshy, Qaratóbe aýdandyq ishki saıasat bóliminiń basshysy Nurtas Safýllın naýryz merekesi men kórisý aıtynyń tarıhy men mán-mańyzyn áńgimelep berdi. Zańger Abzal Quspan «Otbasy hrestomatııasy» aıdarymen shyǵyp jatqan jańa kitaptardy tanystyrsa, Oral qalalyq máslıhatynyń depýtaty, belgili ónerpaz Arman Bıǵalıev halyqty meırammen quttyqtap, patrıottyq ánderdi shyrqady.
Kórisý kúnine oraı Bórli jáne Syrym aýdanynda ulttyq at sporty túrlerinen túrli jarystar ótti. Al Oral qalasynda Qadyr Myrza Álı atyndaǵy mádenıet jáne óner ortalyǵyynń jazǵy amfıteatrda ótken qaıyrymdylyq sharasynda jınalǵan qarjy aýyr dertke shaldyqqan oraldyq búldirshin Emır Shahmarovtyń otbasyna berildi.
«Kórisý – júrektegi Nurdy bólisý» dep aqyn, Qazaqstan jazýshylar odaǵynyń múshesi Munaıdar Balmolda jazǵandaı, bul kúni uıymdastyrylǵan árbir is-shara izgilikke toly boldy.
