Qaýmalda alǵash ret byltyr qańtar aıynda BUU baǵdarlamasy aıasynda arnaıy ornatylǵan fototuzaqqa mysyq tuqymdasyna jatatyn eń iri ań – qar barysynyń (ilbis) da túsip qalǵany tirkelgen. Elimizdiń aýmaǵynda 130-ǵa jýyq, al jer betinde birneshe myńy ǵana qalǵan osynaý ań túriniń Jambyl jerinen ushyrasýy, shynynda da súısinerlik jańalyq. Osyǵan baılanysty Almaty qalasyndaǵy zoologııa ınstıtýtynan arnaıy mamandar kelip, fototuzaq túsirilimderi boıynsha zertteý jumystaryn júrgizdi. Nátıjesinde, qaýmal aýmaǵyndaǵy taý qoınaýlaryn 4 birdeı qar barysy mekendeıtinine naqtyly kóz jetkizilgen-di.
Al Merki ormandardy jáne janýarlar dúnıesin qorǵaý jónindegi kommýnaldyq memlekettik mekemesiniń dırektory J.Ibraımovtyń aıtýynsha, búginde qaýmal aýmaǵyndaǵy qar barysynyń sany 8 basqa jetken. Bul aýmaqty sondaı-aq 140 arqar, 8 úndi jaırasy mekendeıtini de málim bolyp otyr.
Osy oraıda aıta keterlik jaı, byltyrdan bastap oblys ákiminiń bastamasymen Merki aýdanynyń taýly aımaǵynda memlekettik óńirlik tabıǵı saıabaq qurý isi qolǵa alynǵany barshaǵa málim. Qazirgi ýaqytta atalǵan jobanyń jaratylystaný-ǵylymı tujyrymdamasy tolyqtaı daıyndalyp bitti. Endi tabıǵı saıabaqtyń shekara-shegi belgilenip, tehnıkalyq-ekonomıkalyq negizdemesin túzý jumystary júzege asyrylý ústinde.
Baımahanbet AHMET,
jýrnalıst
Jambyl oblysy
