Aıta keteıik, buǵan deıin Memleket basshysy Qasym-Jomart Toqaev Naýryz meıramyn merekeleý tujyrymdamasyn ázirlep, kóktemgi merekeniń mazmunyn baıytý qajettigi týraly aıtqan bolatyn. Naýryz - jańarý, halyqty birlikke uıystyrý merekesi, sondyqtan jurt birigip, muqtaj jandarǵa kómek qolyn sozýy kerek.
«Igi ister» jalpyulttyq marafony aıasynda elordalyq eriktiler, mesenattar, kásipkerler, belsendiler naýryz aıynan bastap jalǵyzbasty zeınetkerlerge, qart adamdarǵa, kópbalaly, áleýmettik az qamtylǵan jáne múgedek balalardy tárbıelep otyrǵan otbasylarǵa eki myńnan astam azyq-túlik sebetin taratty. Qarly kúnderi aýlalaryn qar men muzdan tazartýǵa kómektesti. Is-sharalardyń bári sanıtarlyq normalar men talaptardy qatań saqtaı otyryp ótkiziledi.
Bul ıgi ister Naýryz meıramyn toılaý kúnderi de jalǵasyn tabady. Merekege oraı myńǵa jýyq azyq-túlik sebetin taratý josparlanyp otyr.
«Biz qalanyń barlyq turǵynyn belsendilik tanytýǵa jáne muqtaj adamdarǵa kómek kórsetýge, ıaǵnı qar kúreý, dári-dármekterge barý, azyq-túlik satyp alý sekildi qaıyrymdylyq sharalaryna shaqyramyz. Adam óz basyndaǵy qıyndyǵyn eńserý úshin jalǵyz ózi ǵana emes ózgelerdiń de járdem berip, qoǵamnyń bir bólshegi ekenin sezinýi qajet. Sondaı-aq koronavırýsty juqtyrý qaýpi áli de bar ekenin umytpańyz. Ásirese mereke kúnderi adam kóp jınalatyn oryndardan aýlaq bolǵan jón. Bul kúnderdi úıde, otbasymen birge, ıaǵnı shaǵyn ortada ótkizgen durys. Demalys kúnderi ýaqytty qyzyqty ótkizý úshin qalanyń mádenıet mekemeleri teledıdar men áleýmettik jelilerde tikeleı efırde ótkiziletin onlaın is-sharalar keshenin daıyndady. Olardyń arasynda konsertter, kórmeler, teatrlandyrylǵan qoıylymdar, tarıhı-tanymdyq dárister men konferensııalar, aksııalar men konkýrstar bar», delingen habarlamada.
