Túrkistan oblysy Saıram aýdandyq polısııa basqarmasyna 14 naýryz túngi saǵat 23:00 shamasynda jergilikti áıel turǵyn kúıeýiniń iz-tússiz joǵalǵany týraly aıtyp, aryzdanady. Saıramdyq saqshylar aryzdy birden tirkep, joǵalǵan azamatty izdestirýge kirisedi.
Jan-jaqqa baǵyttamalar berilip, aýdandyq polısııa basqarmasynyń jeke quramy jumyldyrylady. Aýdandaǵy taksı júrgizýshilerinen jáne kórýi múmkin degen turǵyndardan suraq-jaýaptar alynady. Osyndaı atqarylǵan aýqymdy jumystardyń nátıjesinde aýdan polıseıleri kúdiktiniń izine túsedi. Onyń túr-tulǵasyn anyqtap, joǵalǵan er azamattyń tanysy ekenin biledi. Kúdikti Saıram aýdanyndaǵy Qaramurt aýylynyń turǵyny bolyp shyqty. Ol óz kinásin moıyndamaı, jaýaptan jaltarýǵa tyrysady.
Alaıda polıseıler dálelder men aıǵaqty zattardy jınaqtap, joǵalǵan azamat óziniń BMW kóligin tastap, tek osy kúdiktimen jolyqqanyn jáne kúdiktiniń kóligine otyryp ketkenin tolyǵymen dáleldep shyǵady. Osydan soń baryp, kúdikti óz kinásin tolyq moıyndaıdy.
Tekserý barysynda belgili bolǵandaı, joǵalǵan er azamat óziniń tanysyndaǵy iri kólemdegi aqshasyn alý úshin jolyqqan. Kúdiktiniń kóligine otyryp, jolda ketip bara jatyp ekeýiniń arasynda daý-janjal týyndaǵan. Nátıjesinde qaryzdy qaıtarǵysy kelmegen kúdikti er azamatty aıaýsyz qylqyndyryp, jer jastandyrǵan. Al máıitti óziniń burynǵy jumys isteıtin orny, karerdiń mańyna aýyr qylmysyn jasyrý maqsatynda kómip tastaǵan. Kúdikti er azamat qamaýda. Ol buryn sotty bolmaǵan. Búginde oǵan qatysty QR QK-niń 99-babynyń 1-bóligimen (Adam óltirý) boıynsha sotqa deıingi tergep-tekserý jumystary júrgizilýde. Istiń tolyq mán-jaıy tergeý barysynda anyqtalatyn bolady.
