Senat Spıkeri Máýlen Áshimbaevtyń tóraǵalyǵymen ótken Palata otyrysynda depýtattar «2005 jylǵy 25 qarashadaǵy Táýelsiz Memleketter Dostastyǵyna qatysýshy memleketterdiń avtokólik quraldaryn jymqyrýǵa qarsy kúrestegi jáne olardy qaıtarýdy qamtamasyz etýdegi yntymaqtastyǵy týraly kelisimge ózgerister engizý týraly hattamany ratıfıkasııalaý týraly» zańdy qarap, qabyldady.
Bul kelisim TMD elderiniń aýmaǵynda tirkeýden shyǵarylǵan jáne apatqa ushyraǵan avtokólikter týraly málimetter jarııalanatyn derekterdiń aqparattyq bazasynyń jumysyn qoldaýdy kózdeıdi. Málimettermen jedel almasý tájirıbesi Dostastyqqa múshe memleketterdiń avtokólik urlyǵymen kúres jáne olardy qaıtarý jumystarynda birlesip, belsendi áreket etýge múmkindik beredi.
Otyrys barysynda qaralǵan zań jobalarynyń biri taýar belgilerine patent alý, qyzmet kórsetý belgileri jáne taýar shyǵarylǵan jerlerdiń ataýlaryna qatysty boldy. Bul jónindegi normalar búgin qabyldanǵan «Eýrazııalyq ekonomıkalyq odaqtyń taýar belgileri, qyzmet kórsetý belgileri jáne taýarlar shyǵarylǵan jerlerdiń ataýlary týraly shartty ratıfıkasııalaý týraly» zańda jazylǵan.
Osy zań arqyly endi qazaqstandyqtarǵa EAEO elderi aýmaǵynda jumys isteý úshin patent alý rásimi jeńildeıdi. Ol úshin azamattar EAEO-ǵa múshe memleketterdiń biriniń patent beretin vedomstvosyna júginse jetkilikti. Osylaısha Ekonomıkalyq Odaq aýmaǵynda óz taýar belgisin qorǵaýǵa múmkindik alady. Sondaı-aq, jańa normalar EAEO naryǵyna arnalǵan otandyq taýar óndirýshilerdiń quqyqtaryn qorǵaý deńgeıin arttyra túsedi.
Sonymen qatar búgin senatorlar «Qazaqstan Respýblıkasy men Bolgarııa Respýblıkasy arasyndaǵy sottalǵan adamdardy berý týraly shartty ratıfıkasııalaý týraly» zańdy qarap, qabyldady. Bul qujat arqyly sottalǵan adamdardy ári qaraı jazasyn óz elinde óteý úshin berýge múmkindik týaady.
Al «Eýrazııalyq ekonomıkalyq odaqqa múshe memleketterdiń temeki ónimderine aksızder salasyndaǵy salyq saıasatyn júrgizý qaǵıdattary týraly kelisimdi ratıfıkasııalaý týraly» zań 2024 jyldan bastap temeki ónimderine aksızderdiń ındıkatıvtik mólsherlemesin qoldanýdy qarastyrady. Mundaı norma EAEO-ǵa múshe memleketterdiń aýmaǵynda temeki ónimderiniń aksızderine salyq salýda biryńǵaı tájirıbeni qoldanýdy qamtamasyz etedi.
Odan bólek, senatorlar «Qazaqstan Respýblıkasynyń keıbir zańnamalyq aktilerine advokattyq qyzmet jáne zań kómegi máseleleri boıynsha ózgerister men tolyqtyrýlar engizý týraly» zań jobasy boıynsha kelisim komıssııasynyń quramyn bekitti. Bul qujat boıynsha Májilistiń pikirin qaraý jáne kelisý úshin Parlamenttiń kelisim komıssııasynyń quramyna Senattan Sáýle Aıtpaeva, Andreı Lýkın jáne Sultanbek Mákejanov usynyldy.
Otyrysta senatorlar depýtattyq saýaldaryn da joldady. Depýtat Nurjan Nursıpatov qos azamattyq máselesin kóterip, bul baǵyttaǵy sharalardy júıeleý kerektigin aıtty. Al senator Sergeı Ershov aksızderdiń ósý esebinen kóbeıgen salyq túsimderin halyqtyń áleýmettik-osal toptaryna jumsaýdyń mańyzy zor ekenin jetkizdi. Depýtat Bekbolat Orynbekov Taraz qalasynda sý tazalaý qurylǵylarynyń qurylysyn júrgizý qajettigin sóz etse, senator Murat Baqtııaruly Aral teńizine qatysty máselege nazar aýdardy.
