Qazir óńirde 3000-nan asa adam tirkelip úlgerdi. Olımpıada jeńimpazdary elimizdiń úzdik mektepterinde bilim alýǵa, qashyqtan akademııalyq qoldaýǵa ıe bolady.
Olımpıada tegin ótkiziledi. Mundaǵy basty ereje – úmitkerler sońǵy eki oqý jylynda aýyl mektepterinde bilim alýy tıis. Sondaı-aq, bıyl olımpıadaǵa 2020 jyly qatysqan aýyl mektepteriniń 6-synyp oqýshylaryna da qatysýǵa ruqsat etiledi.
– О́tken jyly olımpıadaǵa 5 jáne 6-synyp oqýshylarynan I kezeń qorytyndysy boıynsha 301 bala iriktelip alyndy. II kezeń qorytyndysymen 5 synyptan–38 bala, 6 synyptan–37 bala, barlyǵy 75 oqýshy jeńimpaz atandy. Búgingi tańda 23 oqýshy daryndy balalarǵa arnalǵan mamandandyrylǵan mektepterde oqýyn sátti jalǵastyrýda. Bıyl biz qatysýshylardyń sany elimiz boıynsha 15500-ge deıin ósedi dep boljap otyrmyz. Jalpy bizdiń óńirde aýyl oqýshylarynyń olımpıadaǵa qatysý úshin qajetti jaǵdaıdyń bári jasalǵan, dedi oblystyq bilim basqarmasy basshysynyń orynbasary Baǵdat Berdáýletov.
Joba portalyndaǵy tirkeý nysany Bilim mınıstrliginiń taldaý ortalyǵymen birlesip jumys isteıdi. Eger ótinishti qalalyq jerden kelgen oqýshy berse, oǵan avtomatty túrde bas tartý týraly sms habarlama keledi. Jalpy, olımpıadany ótkizý kezinde oqýshylardyń tanymdyq jáne akademııalyq daǵdylary onlaın jáne oflaın rejıminde kompıýterlik testileý arqyly baǵalanady. Test suraqtaryn mamandandyrylǵan jumys toby halyqaralyq standartqa sáıkes ázirledi.
– Olımpıadaǵa qatysý úshin oqýshy 24 aqpannan - 24 naýryzǵa deıin arnaıy saıtqa tirkelýi tıis. Olımpıada 2 kezeń boıynsha ótedi. Birinshi kezeń logıkalyq jáne keńistiktik oılaý sekildi eki bólimnen turady. Testileý Elbasy Akademııasynyń platformasynda onlaın formatta ótkiziledi, dedi oblystyq «Daryn» ǵylymı-praktıkalyq ortalyǵynyń dırektory Gúljahan Izbasarova.
О́ńirler boıynsha eń joǵary qorytyndy ball jınaǵan 5 myń oqýshy olımpıadanyń ekinshi kezeńine ótedi.
