Úkimet basshysy QR ekonomıkasyn damytý, iskerlik ahýaldy jaqsartý, ınvestısııa tartýdyń jańa tásilderin qabyldaý jáne sanıtarlyq-epıdemıologııalyq jaǵdaıdy turaqtandyrý boıynsha qabyldanyp jatqan sharalar týraly aıtty. Premer-Mınıstr Úkimet qabyldap jatqan daǵdarysqa qarsy sharalardyń nátıjesinde osy jyldyń basynan beri Moody's, Fitch jáne Standard&Poor's jetekshi reıtıngtik agenttikteri pandemııaǵa deıingi reıtıngterin rastaǵanyn jáne 3,2-3,8% sheginde Qazaqstan ekonomıkasynyń damýyna oń boljamdar bergenin atap ótti.
Sondaı-aq Úkimet basshysy «Mura qory» amerıkalyq zertteý ortalyǵynyń (Heritage Foundation) 2021 jylǵy Ekonomıkalyq erkindik ındeksi boıynsha elder reıtınginiń naýryz aıyndaǵy jańartylýynda Qazaqstan óz kórsetkishterin 5 pozısııaǵa jaqsartyp, 178-den 34-orynǵa ıe bolǵanyn atap ótti (2019 jyly – 59 oryn, 2020 jyly – 39 oryn). Oń dınamıka fıskaldyq turaqtylyq, memlekettik shyǵyndardyń, sot júıesiniń tıimdiligi sekildi kórsetkishter boıynsha baıqaldy. Instıtýsıonaldyq orta sapasyn arttyrý faktorlarynyń arasynda ınvestısııalar, eńbek qatynastary jáne qarjy sektorynyń erkindigi atalǵan.
«Biz Qazaqstannyń ınvestısııalyq ahýaly neǵurlym qolaıly elderdiń biri retindegi mártebesin odan ári arttyrý úshin osy serpindi damytýǵa nıettimiz», dedi A. Mamın.
Premer-Mınıstr Eýropalyq Odaq elshilerin Qazaqstannyń EO-men saýda-ekonomıkalyq jáne ınvestısııalyq yntymaqtastyǵyn damytýǵa járdemdesý boıynsha odan ári ashyq jáne belsendi dıalog ornatýǵa shaqyrdy. О́z kezeginde, otyrysta sóz sóılegen EO elshisi Sven-Olov Karlsson, Italııa elshisi Paskal D'Avıno, Avstrııa elshisi Vıllı Kempel jáne Portýgalııanyń QR-daǵy ýaqytsha senimdi ókili Adelına Vııeıra Da Kýnıa Da Sılva Qazaqstannyń ınvestısııalyq ahýaldy jaqsartýdaǵy, bıznesti júrgizý úshin qolaıly jaǵdaılar jasaýdaǵy eleýli progresin, sondaı-aq EO-nyń QR-men ekonomıkalyq yntymaqtastyqty odan ári arttyrýǵa múddeli ekenin atap ótti. Taraptar pandemııa saldaryn eńserý jáne ekonomıkany qalpyna keltirý máseleleri boıynsha Qazaqstannyń Eýropalyq Odaqpen yntymaqtastyǵynyń perspektıvalaryn talqylady. Ulttyq jáne halyqaralyq deńgeıde iskerlik ahýaldy odan ári jetildirý, medısına salasyndaǵy ózara is-qımyldy keńeıtý, sheteldik zańdy tulǵalarǵa qatysty salyqtyq ákimshilendirýdi jaqsartý, sot jáne sottan tys tetikter (tórelik) arqyly sheteldik kompanııalardyń qatysýymen daýlardy retteý máseleleri qaraldy.
EO qarjy ınstıtýttarymen yntymaqtastyqty damytýda jáne eýropalyq kompanııalardyń ınvestısııalaryn tartýda AHQO áleýetin arttyrýǵa erekshe kóńil bólindi. Kezdesýge QR Úkimetiniń músheleri, Strategııalyq josparlaý jáne reformalar jónindegi agenttiktiń, Básekelestikti qorǵaý jáne damytý agenttiginiń, «Kazakh Invest» UK» AQ basshylyǵy, QR Joǵarǵy sotynyń ókilderi, Eýropalyq Odaqtyń, Germanııa, Rýmynııa, Polsha, Belgııa, Italııa, Slovakııa, Ispanııa, Lıtva, Horvatııa, Grekııa, Bolgarııa, Vengrııa, Fransııa, Avstrııa, Latvııa, Chehııa elshileri, Portýgalııa, Nıderlandy, Fınlıandııa, Estonııa jáne t. b. ókilderi qatysty. EO — Qazaqstannyń negizgi ınvestorlarynyń biri jáne iri saýda seriktesi. 2020 jyly taýar aınalymy $23,6 mlrd qurady.
