Er balaǵa jıi qoıylǵan esimderdiń úshtigin Aısultan (841) men Nurıslam (765) tolyqtyrsa, al qyzdar arasynda Asylym (1 183) men Raıana (1 172) bekitip tur. 2019 jyly da er balaǵa berilgen osy úsh esim aldyńǵy qatarda bolǵan. Bul jyly 4 268 balaǵa Álıhan,
3 270 sábıge Aısultan, 2 528 ulǵa Nurıslam esimi qoıylǵan. Al qyzdar esiminiń úzdik úshtiginde sál ózgeris bar. Sebebi byltyr Raıana (5 601) birinshi orynǵa shyǵyp, ekinshi orynǵa Medına (5 320 qyz) turaqtaǵan bolsa, 4 510 «keste tigerge» Aızere esimi berilgen.
Bıyl Alash qaıratkeri Álıhan Bókeıhannyń týǵanyna 155 jyl toldy. Joǵarydaǵy san sanaly ǵumyryn ultyna qyzmet etýge arnaǵan uly tulǵanyń esimin osylaı da ulyqtaýǵa bolatynyn ańǵartady. Maqsaty eldik múdde bolǵan kósemniń Alash jurtymen máńgi jasaýy degen osy bolar! Al «Paıǵambar qalasynyń» qasıetin arttyrǵan Medına-Mádınalar kóbeıse, musylmandyǵymyzdyń muqalmasy anyq. Eki jyldan beri qyz balaǵa eń kóp qoıylyp júrgen esimderdiń biri – Raıana. «Ar-Raııan» – musylmandar kiretin Jánnat qaqpalarynyń biri. Urpaǵynyń salıqaly, qyzynyń kórkem minezdi bolyp ósýin tilegen ata-ananyń sábıine bul esimdi yrymdap qoıatyny sózsiz. Aısultan men Asylym da máni tereń, maǵynasy mol, ult ereksheligin bildiretin esimder.
Ras, ár zamannyń talaby men suranysy esim tańdaýǵa da áser etedi. Balaǵa at qoıý – ulaǵatty dástúr ekenin eskersek, bul saltqa salǵyrt qaramaǵan durys. Sebebi, adamnyń aty – tańdalǵan taǵdyry ispetti.
Bizdi el egemendiginiń ordaly jasynda tarıhı tulǵalardyń esimin jańǵyrtyp, ımandylyqtan nár alyp, rýhanı bolashaqqa bet túzegen Qazaq eliniń sábıine esim qoıýǵa erekshe mán bergeni qýantady. Al qazirgideı almaǵaıyp zamanda Álıhandarymyz kóbeıse, Qazaq eli alǵan baǵytynan adaspaıtyny anyq.
