Jıynda megapolıstiń COVID-19-ǵa qarsy is-qımyldyń júıeli máseleleri men keshe 1 sáýir kúni elimizdegi epıdemııalyq ahýalǵa baılanysty ótken keńes barysynda Memleket basshysynyń bergen tapsyrmalarynyń oryndalý barysy qarastyryldy.
Shymkentte epıdemııalyq jaǵdaıdyń kúrdelene túskenin aıtqan qala basshysy turǵyndar arasynda maska rejimi men áleýmettik qashyqtyqty qatań saqtaý boıynsha túsindirý jumystaryn kúsheıtýdi jáne qala turǵyndaryn adam kóp shoǵyrlanǵan jerge barýdan bas tartýǵa shaqyrdy.
«Sońǵy eki táýlikte shaharda indet juqtyrǵan 147 naýqas tirkelgen. Bul kórsetkish kún saıyn artyp otyr. Sondyqtan Shymkent qalasy koronavırýstyń taralýy boıynsha «sary aımaqqa» endi. Bul qaýipti indetten qorǵanýdyń birden-bir joly koronavırýsqa qarsy vaksınasııany qabyldaý. Sondyqtan sala mamandary osy baǵyttaǵy jumystardy kúsheıtip, halyq arasynda túsindirý jumystaryn kúsheıtý kerek», dedi qala ákimi.
Densaýlyq saqtaý basqarmasynyń basshysy B.Pozılovtyń habarlaýynsha, búginde Shymkent qalasynda jalpy koronavırýsqa qarsy ekpeniń 1-shi komponenti 7400 adamǵa, al ekinshi komonenti 3385 adamǵa egilgen eken. Sonymen qatar ol ınfeksııaǵa qarsy vaksınasııalaý jumystary qaladaǵy 26 emdeý mekemesinde jáne demalys kúnderi de júrgizilip jatqanyn aıtty. Buǵan qosa qosymsha 10 bastapqy medısınalyq-sanıtarııalyq alǵashqy kómek kórsetý uıymdarynda ekpe jasaý úshin arnaıy kabınetter daıyndalǵan.
Qala ákimi Murat Áıtenov qalada koronavırýspen kúrestiń 3 ssenarııi ázirlengenin aıtyp, ótken jylǵy qatelikterdiń oryn almaýyn basa aıtty.
«Qazir A ssenarııi boıynsha jumys júrgizilip jatyr. Bul ssenarıı boıynsha 1380 tósek-oryn daıyn. B jáne S ssenarııleri boıynsha 5 myń tósek-orynǵa jetkizýimiz kerek. Ár aımaqqa jetken kezde tıisti qural-jabdyqtarmen, dári-dármektermen qamtamasyz etý bas dárigerlerdiń mindeti. Sonymen birge olar naýqastardy qabyldaý algorıtimin ázirleýi tıis. Adamdardyń jınalyp qalýyn jáne kezek kútpeýin qamtamasyz etýi kerek. Daıyndyqtar pysyqtalyp, kemshilikter anyqtalyp, sheshim joldary qaralsyn», dedi M.Áıtenov.
Osy tusta qalanyń bas dárigeri koronavırýs ınfeksııasyna shaldyqqan naýqastardy emdeý úshin qaladaǵy medısınalyq uıymdarda qajetti jaǵdaıdyń barlyǵy jasalǵanyn atap ótti. Ol medısınalyq uıymdarda 900 mln teńgeniń dári-dármek qorynyń bar ekenin, bul eki aıǵa deıin jetetinin málim etti. Sonymen qatar qala turǵyndaryna qyzmet kórsetetin 11 PTR zerthanasy jumys jasaýda. Zerthanalarda táýligine barlyǵy 6 270 test jasaý qýattylyǵy bar.
Aıta keteıik, ótken táýlikte COVID-19 ınfeksııasyn juqtyrǵan 96 jaǵdaı tirkeldi. Al qalada jyl basynan beri 1440 jaǵdaı tirkelgen. Búgingi kúni qalada 1 380 tósek-oryn bar onyń 1067 tósek – orny bos. Juqpaly jáne karantındik aýrýhanalarda 313 naýqas em qabyldaýda. Aýrýhanadaǵy tósek oryndar tolymdylyǵy 22% quraıdy.
