Jobany «Allıýr» kompanııalar toby» AQ jáne «Tatneft» JAQ birlesken kásiporny – «KamaTyresKZ» JShS júzege asyrady. Zaýyttyń óndiristik qýaty birinshi kezeńde jyl saıyn 3,5 mln kópbeıindi shınany quraıdy, keıinnen jylyna 9 mln shınaǵa deıin jetkiziledi. Zaýyt QR avtomobıl óndirisin oqshaýlaý deńgeıin arttyrýǵa jáne shınalar ımportyn almastyrýdy qamtamasyz etýge múmkindik beredi. Bul rette ónimniń 40%-yn eksporttaý josparlanýda. Jobany 2022 jyldyń sońynda iske asyrý josparlanǵan. Investısııalardyń jalpy kólemi 125 mlrd teńgeni quraıdy.
Zaýytta 1100-den astam joǵary bilikti jańa jumys oryndary qurylatyn bolady. Kásiporyn personaly «Tatneft» JAQ shına kásiporyndarynda taǵylymdamadan óte bastady. Úkimet basshysy shına zaýytyn salý jobasy Qazaqstan men Reseı arasyndaǵy ónerkásiptik kooperasııanyń naqty is júzinde keńeıgenin aıǵaqtaıtynyn atap ótti.
«Saran qalasynda shına zaýytyn salý Qaraǵandy oblysynyń jáne jalpy Qazaqstannyń ekonomıkasyna mýltıplıkatıvti áserin tıgizedi, onyń básekege qabilettiligin arttyrady jáne joǵary bilikti jańa jumys oryndaryn qurady. Zaýyt óńirdegi eń iri zaýyttardyń birine aınalady, onyń ónimderi joǵary eksporttyq áleýetke ıe bolady», dedi A. Mamın.
Tatarstan Prezıdenti R. Mınnıhanov óz sózinde Qazaqstan Tatarstannyń jetekshi sheteldik seriktesteriniń biri bolyp tabylatynyn atap ótti. 2020 jyly pandemııaǵa qaramastan taýar aınalymy 14%-ǵa ósip, $630 mln-nan asty.
«Shına zaýytynyń salynýy men iske qosylýy Qazaqstannyń qarqyndy áleýmettik-ekonomıkalyq damýyn qamtamasyz etý jónindegi sharalar kesheniniń mańyzdy elementine aınalatynyna, sondaı-aq Reseı Federasııasy men Qazaqstan Respýblıkasynyń qarym-qatynasyn nyǵaıtý jolynda Tatarstan-Qazaqstan yntymaqtastyǵyn odan ári arttyrýǵa túrtki bolady dep senemin», dedi ol.
RTB aýdanyndaǵy ındýstrııalyq aımaq aýmaǵynda shına zaýytynyń qurylysy úshin beton quıý rásimine Qaraǵandy oblysynyń ákimi Jeńis Qasymbek, ındýstrııa jáne ınfraqurylymdyq damý mınıstri Beıbit Atamqulov, «Tatneft» JAQ bas dırektory Naıl Maganov, «Allıýr» kompanııalar toby» AQ dırektorlar keńesiniń tóraǵasy Andreı Lavrentev jáne «KamaTyresKZ» JShS dırektory Aleksandr Smyshlıaev qatysty.
QR Premer-Mınıstri A. Mamın men Tatarstan Prezıdenti R. Mınnıhanovtyń qatysýymen «QazMunaıGaz» UK» AQ men «Tatneft» JAQ arasynda bıtýmdy modıfıkasııalaýda, adgezıvterdi, jelimderdi, rezeńkeler men ekologııalyq taza shınalardy daıyndaýda qoldanylatyn býtadıen kaýchýkterin óndirý jobasy boıynsha yntymaqtastyqtyń bazalyq sharttary týraly kelisimge qol qoıyldy. Jobany iske asyrý merzimi – 2021-2025 jyldary, óndiris qýaty jylyna 186 myń tonna býtadıen kaýchýgy men 170 myń tonna ızobýtandy quraıtyn bolady.
Budan basqa Indýstrııa jáne ınfraqurylymdyq damý mınıstrligi men «Tatneft» JAQ arasynda Qazaqstanda bıtým zaýytyn salý nıeti týraly kelisimge qol qoıyldy.
Qaraǵandy oblysyna jumys sapary aıasynda Qazaqstan Úkimetiniń basshysy men Tatarstan Prezıdenti sonymen qatar «Soltústik-Ońtústik» baǵyty boıynsha aýyl sharýashylyǵy ónimderiniń saýda aǵymyn baılanystyryp otyrǵan QR-daǵy eń iri «Global City» kóterme-taratý ortalyǵynyń jumysymen tanysty.
