«Vaksınasııa — lokdaýndar men karantındik shekteýler bolmaǵan kezge, ıaǵnı qalypty ómirge oralýǵa múmkindik beretin jalǵyz tıimdi ádis ekenin eskere otyryp, halyq arasynda vaksınasııany bastaımyz. Vaksınasııa adamdardyń bir mezgilde kóp jınalýyn boldyrmaý jáne qala turǵyndary úshin neǵurlym qolaıly jaǵdaı jasaý úshin aldyn ala jazylý arqyly júrgiziledi. Bul vaksınalardy medısınalyq mekemeler arasynda birkelki bólýge múmkindik beredi. Jasyna baılanysty shekteýler men medısınalyq kórsetkishterdi eskere otyryp, 600 myńnan astam turǵyn vaksınasııalaýǵa jatady. Tek sáýir aıynda ǵana Densaýlyq saqtaý mınıstrligi (SK-Farmasııa) 280 myńnan astam doza vaksına jetkizýdi josparlap otyr», dep jazdy ákim.
Onyń aıtýynsha, egý pýnkteriniń sany 36-dan 100-ge deıin kóbeıgen. Vaksınasııa pýnkteriniń jumys ýaqyty saǵat 8:00-den 00:00-ge deıin uzartyldy.
«Vaksınany alǵysy keletinderdiń bári ótinish qaldyra alady. Emhanaǵa tirkelý orny boıynsha aldyn ala jazylý kerek. Densaýlyq saqtaý basqarmasynyń saıtynda alǵashqy medısınalyq-sanıtarlyq kómek uıymdarynyń baılanys nómirleri, mekenjaılary kórsetilgen tizim jarııalandy. Ekpe alýǵa jazylý Damumed mobıldi qosymshasy arqyly da júzege asyrylady. Qosymshada pasıenttiń jeke kabıneti arqyly ýchaskelik dárigerdiń qabyldaýyna jazylý jáne eskertpede KVI-ǵa qarsy ekpe alǵysy keletinin kórsetý jetkilikti», delingen jazbada.
Sondaı-aq aptanyń sońyna deıin medısınalyq mekemeler vaksınasııaǵa nıet bildirýshilerdi tirkep, apta sońynda vaksınasııalaýǵa kirisedi. Densaýlyq saqtaý mınıstrligi jaqynda "elektrondyq úkimet" portalynda vaksınasııalaýǵa elimiz boıynsha ortalyqtandyrylǵan ótinimderdi qabyldaýdy iske qosady. Onda "vaksınasııaǵa jazylý" jeke qoıyndysy bolady.
«Medısınalyq mekemeler ekpe alǵysy keletin barlyq turǵyndardy qabyldaýǵa daıyn. Degenmen Mega Silk Way SOO sııaqty birqatar saýda-oıyn-saýyq ortalyǵynyń ınfraqurylymyn daıyndadyq. Sonymen qatar qaladaǵy qonaqúıler de daıyn. Qajet bolǵan jaǵdaıda, vaksınasııa pýnktterin sol jerde de ornalastyrýǵa bolady.
Birinshi kezeńde ekpeni koronavırýspen kúreste aldyńǵy shepte júrgen medısına qyzmetkerleri, muǵalimder, tártip saqshylary jáne t. b. aldy.
Qazir qala turǵyndary ekpe alýǵa nıet bildirip jatyr. Bul bizdi qýantady, óıtkeni halyqty vaksınasııalaý ujymdyq ımmýnıtetti qalyptastyrýǵa jáne týystary men aınalasyndaǵy adamdardy qorǵaýǵa múmkindik beredi. Ekpe alǵandar maska taǵyp, sanıtarlyq normalardy saqtaý qajet», dep jazdy elorda ákimi.
