Qan quramynyń san qyry ashylady

Naýryz aıynda Nur-Sultan qalasyndaǵy Transfýzıologııa ǵylymı-óndiristik ortalyǵynyń (TǴО́O) bazasynda halyqaralyq IX ǵylymı-praktıkalyq konferensııa ótken bolatyn. Reseı, Ýkraına, Belarýs, Qyrǵyzstan, Tájikstan, О́zbekstannyń transfýzııalyq medısına salasyndaǵy mamandary onlaın rejiminde qatysqan konferensııada sóz bolǵan dúnıeler qan quramyna bókken talaı syr men múmkindikterdi ortaǵa saldy.

Negizgi maqsaty qan qyzmetin jáne densaýlyq saqtaýdyń irge­les salalaryn damytýdyń ózekti máselelerin talqylaý bolǵan jıynda Mınsk qalasyndaǵy Trans­fýzıologııa jáne medısınalyq bıo­tehnologııalar respýblıkalyq ǵylymı-praktıkalyq ortaly­ǵynyń dırektory, medısına­ ǵy­lymdarynyń kandıdaty F.Kar­penko elindegi qan qyzme­tiniń jetistikteri týraly baıandama jasady. Onyń donorlyq qannan alynatyn shıkizatty óńdeý táji­rıbesi jónindegi habarlamasy tyńdaýshylardyń aıtarlyqtaı qyzyǵýshylyǵyn týdyrdy. О́ıtkeni Belarýs elindegi qan qyzmeti uıymdary dástúrli ónimder – albýmın, ımmýnoglobýlınder alýmen shektelip, taptaýryn jolmen júre bermeı, jasýshalyq tehnologııalar negizinde jasalǵan jańa ónimderdi shyǵarýdy qolǵa alypty. Pasıentterdi emdeýde jáne ásemdik pen árleýge qajet kosmetologııada qoldanylatyn bul jańa ónimder qan syrynyń taǵy bir paraǵyn ashqandaı.

Elimizdiń transfýzıologııa salasy qarqyndy damý ústinde. Otan­dyq transfýzıologtar pa­sıent­terdi emdeýde qandy quıýdan tys onyń komponentterine dıf­ferensııalanǵan terapııa usynyp, transplantologııany alǵa jyljytýda sheshýshi ról atqaryp júr­genin buryn da jazǵan bolatynbyz. Elordada arnaıy eko­nomıkalyq aımaq jaǵdaıynda uıym­dast­y­rylǵan qan qyzmeti úshin medı­sınalyq maqsattaǵy buıym­dardy óndirý tájirıbesi týraly habar­lama mamandardyń erekshe qyzyǵýshy­lyǵyn týdyrdy.

«Eira Med» JShS bas dırektory M.Ábdihalıeva zaýyttyń óndi­ristik alańynda donorlyq qan men onyń komponentterin daıyndaý úshin polımerlik konteınerler men sterıldi eritindiler shyǵarý jolǵa qoıylǵanyn, sondaı-aq sıtaferez jáne donorlyq qan komponentterindegi patogenderdi ınaktıvasııalaý júıelerin óndirý bastalǵanyn habarlady. Bul rasynda da eleńdeterlik dúnıe. Trans­fýzıologııa ǵylymı-ón­diris­tik orta­lyǵynyń basqarma tóraıymy S.Ábdirahmanova osy rette ishki naryqqa shyǵarylatyn medısınalyq maqsattaǵy buıym­dar konstrýksııalaryn jobalaý kezinde otandyq tutynýshynyń qajettilikteri eske­rilgenin nazarǵa salyp ótti.

Sondaı-aq medısına ǵyly­my­nyń doktory, reseılik professor E.Jıbýrt­tyń transfýzııalyq ǵylym jáne praktıka salasyndaǵy álemdik jetistikteri týraly baıandamasy qan tylsymynyń áli talaı múmkindigi ashylatynynan habar berdi.

Seksııalyq keńester barysynda otandyq jáne sheteldik spıkerler óteýsiz erikti donorlyqty damytý, klı­nıkalyq transfýzıologııa jáne qan qyzmetindegi zerthanalyq dıagnostıka máselelerine arnalǵan baıandamalaryn usynyp, qan men onyń komponentteriniń óteýsiz erikti donorlyǵyn damytý problemalary, onyń ishinde kovıdtik ınfeksııa rekonvalessentteriniń ımmýndyq plazmasyn donorlyqqa tartý erekshelikteri, sondaı-aq donorlyq qan men onyń kom­po­nentterin daıyndaýdyń utymdy tásilderin sóz etti.

Transfýzıologııa ǵy­lymı-ón­diris­tik ortalyǵynyń mamandary onlaın jıyn barysynda  amotosalen jáne ÝFO óńdelgen konvalessenttik plazmadaǵy SARS-CoV-2 antıde­neleriniń kon­­sentrasııasynyń óz­geris­terin zertteý, ımmýndyq plazma do­nor­laryndaǵy antıdenelerdi anyq­taýdyń tájirıbesin de ortaǵa saldy. Sondaı-aq COVID-19 naý­qastarynda SARS-CoV-2 vırý­synyń saqtalý dınamıkasyn zertteý týraly jumystary da nazar aýdararlyq. Otandyq mamandardyń onkologııalyq aýrýlarǵa ushy­ra­ǵan balalarǵa qan men onyń kom­­­ponentterin quıý kezindegi trans­fýzııalyq tera­pııanyń taktıka­syna, gemo­trans­fýzııalardyń qolaı­syz saldaryn jik­teý jáne ony medı­sınalyq uıym­darda anyqtaý men esepke alý máselelerimen ortaq­tas­qany jıyn mánin asha tússe, ko­ro­navırýs ınfeksııasyn emdeý úshin ım­mýndyq plazmany paıdalaný ke­zinde alynǵan tájirıbelerimen bó­li­­sýi sheteldik transfýzıologtar­dy­ da tánti etkenin aıta ketken láz­im.

Joǵaryda aıtqandaı, qannyń zertteletin syrlary men qyrlary sansyz kórinedi. Bizdiń zertteýshiler qan qyzmetindegi koronavırýs ınfeksııasy markerleriniń jáne gemotransfýzııalyq ınfeksııalar markerleriniń zerthanalyq dıag­nos­tıkasyna, sondaı-aq ım­mýno­gematologııanyń keı­bir aspek­tilerine baılanys­ty birneshe baıandama jasady. Konferensııa sheńberinde ROCHE Diagnostics mamandary kór­setetin gemotransfýzııalyq ınfek­sııa­lardy dıagnostıkalaýǵa arnalǵan zerthanalyq jabdyq­tarǵa servıstik qyzmet kórsetý máselelerin talqylaý boıynsha sattelıtındik keńes ótkizildi. ROCHE DIAGNOSTICS kom­pa­nııasynyń qoldaýymen uıym­dastyrylǵan keńeske Qazaqstan Respýblıkasynyń barlyq qan qyz­meti uıymdarynyń trans­fý­zııa­lyq ınfeksııalar zertha­na­lary­nyń meńgerýshileri qatys­ty.