«Veterınarlyq qyzmet negizinen eldiń ǵalamdyq bıologııalyq qaýipsizdiginiń jalpy júıesiniń bir bóligi bolyp tabylady. Mal dárigerleriniń biliktiliginiń tómendigi jáne mamandardyń jetispeýshiligi janýarlardyń boıyndaǵy juqpaly aýrýlardyń adamnyń ómiri men densaýlyǵyna qaýip tóndirýine sebepshi bolady. Joǵary patogendi qus tumaýynyń kenetten paıda bolǵany bárimizdiń esimizde. Osyndaı jaǵdaılar veterınarlyq qyzmettiń dármensizdigin kórsetti deýge bolady», - dedi Senat depýtaty Muhtar Jumaǵazıev.
Senator qazirgi ýaqytta veterınarııalyq stansııalar men pýnkterde 440-qa jýyq maman jetispeıtinin aıtty. Bul máseleni «Dıplommen – aýylǵa» memlekettik baǵdarlamasy sheshe alatyn edi. Biraq, depýtatyń pikirinshe, atalǵan baǵdarlamada qoıylǵan maqsattar óz deńgeıinde oryndalmaýda jáne aýylǵa baratyn jas mamandarǵa qoldaý kórsetý jetkilikti dárejede iske aspaýda.
«Eger jas mamandarǵa jumys isteýge, aýylda ómir súrýge qajetti jaǵdaı jasalsa, mysaly, qyzmettik turǵyn úıler salynsa, áleýmettik jeńildikter berilse, materıaldy-tehnıkalyq bazasy qamtylsa, kadr máselesi birshama bolsa da óz sheshimin tapqan bolar edi. Bul máselede ýákiletti jáne jergilikti atqarýshy organdardyń, oqý oryndary men jumys berýshilerdiń is-áreketteri birikken jaǵdaıda ǵana belgili bir jetistikterge qol jetkizýge bolady», - dedi senator.
Aýyl sharýashylyǵy mınıstrligi ókilderiniń aqparatyna sáıkes veterınarlyq qyzmetti odan damytý úshin Prezıdenttiń tapsyrmasy boıynsha 2021-2023 jyldarǵa arnalǵan veterınarlyq qyzmetti damytý jáne nyǵaıtý jónindegi keshendi sharalar ázirlengen. Olar janýarlardy, janýarlardan alynatyn ónimder men shıkizatty baqylaý, veterınarııalyq preparattardyń aınalymy, janýarlar aýrýlaryn boljaý, sondaı-aq veterınarııa salasyndaǵy sıfrlandyrý sharalaryn iske asyrýdy kózdeıdi. Bul baǵdarlama sala mamandaryn daıarlaýdy jáne qaıta daıarlaýdy jaqsartýǵa tıis. Kezdesý barysynda agrarlyq sektordaǵy ǵylymı qoǵamdastyq ókilderi birqatar naqty usynystar aıtyp, salany odan ári damytý týraly oılarymen bólisti. Kezdesý qorytyndysy boıynsha qabyldanǵan usynymdar Úkimetke joldanatyn bolady.
