Elorda • 10 Sáýir, 2021

«Mega Silk Way» saýda ortalyǵynda indetke qarsy vaksınalaý bastaldy

6 ret kórsetildi

Elordadaǵy «Mega Silk Way» saýda, oıyn-saýyq ortalyǵynda koronavırýsqa qarsy vaksınalaý bastaldy, dep habarlaıdy Egemen.kz

Vaksınanyń birinshi komponentin saýda, oıyn-saýyq ortalyǵynyń qyzmetkerleri, býtıkterdi jalǵa alýshylar, satýshylar jáne ortalyq qyzmetkerleri aldy. Budan basqa, qalada koronavırýsqa qarsy vaksınalaý aldyn ala jazylý arqyly medısınalyq-sanıtarlyq kómek uıymdarynda, ıaǵnı emhanalarda, otbasylyq densaýlyq ortalyqtarynda, dárigerlik amýblatorııalarda jáne ózge de nysandarda júrgizilip jatyr.

Elordada egý pýnkteriniń sany 36-dan 100-ge deıin ulǵaıtyldy, al olardyń jumys kestesi saǵat 08:00-den 00:00-ge deıin uzartyldy. Vaksınany alýǵa egov mobıldik qosymshasy arqyly nemese 109 nómiri boıynsha call-ortalyqqa qońyraý shalý arqyly jazylýǵa bolady.

«Búgin testilik rejimde SOSO qyzmetkerlerin egýdi bastadyq. Munda shamamen 100 adam bar. Vaksınasııadan buryn olardyń bári dárigerlerdiń mindetti medısınalyq tekserýinen ótti. Al SOSO-da brıgadalar kezekshilik etedi. Vaksınasııaǵa ruqsat berilgender egiledi», dedi Nur-Sultan qalasy Qoǵamdyq densaýlyq saqtaý basqarmasy basshysynyń orynbasary Álııa Rústemova.

Sondaı-aq ol SOSO-da qala turǵyndaryn jappaı vaksınalaý qashan bastalatynyn aıtty.

«Búgin qalalyq sanıtarlyq dárigerdiń qaýlysy boıynsha saýda, oıyn-saýyq ortalyǵy kelýshiler úshin jabyq. Sol sebepti dúısenbide SOSO-da ornalasqan egý ortalyǵy turǵyndardy da, ortalyqqa kelýshilerdi de vaksınalaýdy bastaıdy», dedi Á.Rústemova.

Búginde elordada vaksınalardyń jetkilikti mólsheri bar. Sáýir aıynyń sońyna deıin Nur-Sultanǵa 250 myńnan astam doza keledi. Jalpy, ár apta saıyn Densaýlyq saqtaý basqarmasynyń qoımalaryna «Spýtnık V» jańa partııasy kelip túsedi. Qazirgi kúni koronavırýs ınfeksııasyna qarsy 26 myńnan astam adam ekpe aldy. Qajet bolǵan jaǵdaıda halyqty vaksınalaý pýnkteri birqatar SOSO men qonaqúı keshenderinde ashylatyn bolady.

Sońǵy jańalyqtar

Almaty qalasynda jer silkindi

Aımaqtar • Keshe

Uqsas jańalyqtar