2006 jylǵy Tabys pen múlikke salynatyn salyqqa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly konvensııanyń erejelerine sáıkes, Qazaqstan men Armenııa qarjy mınıstrlikteri qosarlanǵan salyq salýdyń aldyn alý maqsatynda kólik quraldaryna salyq salý boıynsha ózara ýaǵdalastyqqa qol jetkizdi.
«Elimizdiń azamattary Qazaqstannyń aýmaǵyna ákelgen avtokólikter búginge deıin Armenııanyń ýákiletti organdarynda tirkeý esebinen shyǵarylmaǵan soń, eki memleket te osyndaı kólik quraldaryna salyq salýǵa haqyly.
Tıisti kelissózder nátıjesinde Armenııadan 2020 jyldyń 1 aqpanyna deıin ákelinip, menshik quqyǵy boıynsha Qazaqstannyń rezıdentterine tıesili avtokólikterge konvensııanyń 21-baby 4-tarmaǵyna sáıkes, elimizdiń Ishki ister mınıstrliginde tirkeý esebine qoıylǵan sátten bastap, ulttyq zańnama boıynsha Qazaqstanda ǵana salyq salynady. Bul maqsatta eki memlekettiń salyq organdary elimizde tirkelgen kúnin kórsete otyryp, osy kólik quraldary boıynsha málimetter almasatyn bolady. Mundaı kólik quraldaryna qosarlanǵan salyq salý máselesi týyndamaıdy», dedi Qarjy mınıstrliginiń ókilderi.
Salyq kodeksiniń normalaryna sáıkes, kólik salyǵyn tóleý mindeti jyljymaly múlikti Qazaqstannyń memlekettik organdarynda esepke qoıǵan kúnnen bastap júkteledi. Atap aıtqanda, eger de kólik quraly byltyr qarashada tirkelse, bıylǵy sáýirden keshiktirmeı 2020 jyldyń qarasha-jeltoqsan aralyǵyna baılanysty bıýdjetke kólik salyǵyn tóleý qajet. Bul mindet oryndalmaǵan jaǵdaıda ár ótkizilgen kún úshin ósimpul esepteledi.
