Prezıdent • 21 Sáýir, 2021

Prezıdent Reformalar jónindegi joǵary keńestiń kezekti otyrysyn ótkizdi

35 ret kórsetildi

Prezıdent Qasym-Jomart Toqaev Reformalar jónindegi joǵarǵy keńestiń kezekti otyrysyn ótkizdi, dep habarlaıdy Aqordanyń baspasóz qyzmeti.

Memleket basshysynyń tóraǵalyǵymen Reformalar jónindegi joǵary keńestiń besinshi otyrysy onlaın formatta ótti.

Jıynnyń kún tártibinde bes másele qarastyryldy. Ulttyq jobalardy ázirleý jumystary jaıynda Strategııalyq josparlaý jáne reformalar agenttiginiń tóraǵasy Qaırat Kelimbetov baıandama jasady. «Sıfrlyq Qazaqstan» ulttyq jobasynyń transformasııasy týraly Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın aıtty. Aýylsharýashylyǵy mınıstri Saparhan Omarov agroónerkásip keshenin 2026 jylǵa deıin damytýdyń ulttyq jospary daıyndalyp jatqanyn málim etti. Ulttyq ekonomıka mınıstri Áset Erǵalıev «jańadan» retteý tetikteriniń engizilip jatqany jóninde habarlady. Joǵary Sot tóraǵasy Jaqyp Asanov pen Prezıdent Ákimshiliginiń Basshysy Erlan Qoshanov quqyq qorǵaý jáne sot júıesin reformalaý jaıyndaǵy usynystaryn baıandady.

Jıynǵa qatysýshylardyń baıandamalaryn tyńdaǵan Prezıdent reformalardyń strategııasyn daıyndaý perspektıvalaryna keńirek toqtaldy. Memleket basshysy ár baıandama boıynsha eskertý aıtyp, naqty tapsyrma berdi.

Qasym-Jomart Toqaev ulttyq jobalar kúrdeli jáne birin-biri qaıtalamaýy qajet ekenine basa nazar aýdardy. Olar negizgi mindetterdi sheshýge baǵyttalyp, kúsh-jiger men resýrstar «osynda jáne qazir» qaǵıdaty boıynsha jumyldyrylýy tıis.

– Jobalardy irikteýdiń naqty ádistemelik bazasy bolýy kerek. Ol qandaıda bir ulttyq jobanyń keshendi áleýmettik-ekonomıkalyq tıimdiligin eskerýi qajet, qujat túsinikti bolýy tıis. Sýbektıvtilikke jol berilmeıdi, – dedi Memleket basshysy.

Prezıdent ulttyq jobalar barlyq qajetti resýrstarmen qamtamasyz etilip, bıýdjetten qarjylandyrý kezinde sózsiz basymdyqqa ıe bolýy tıis ekenin atap ótti.

Memleket basshysy óziniń Reformalar jónindegi joǵary keńestegi orynbasary Ser Sýma Chakrabartıge jáne onyń komandasyna ulttyq jobalardy saraptaý boıynsha atqarǵan jumystary úshin alǵys bildirdi. Qasym-Jomart Toqaevtyń aıtýynsha, usynystar ekonomıka, áleýmettik sala jáne memlekettik basqarý boıynsha reformalardy júzege asyrý barysynda negizgi baza retinde qoldanylýy múmkin.

«Sıfrlyq Qazaqstan» ulttyq jobasy boıynsha Baǵdat Mýsınniń jańalyqtar engizý týraly baıandamasy oń baǵalandy. Prezıdent sıfrlyq salany damytý tujyrymdamasyndaǵy usynystardy jáne «DigitEL» ulttyq jobasyn maquldady.

Prezıdent agroónerkásip keshenin damytýdyń 2026 jylǵa deıingi ulttyq jobasy týraly da pikirin aıtty. Qasym-Jomart Toqaev bul qujattyń aýqymdylyǵyn atap ótip, oǵan salanyń búkil baǵyttary engizilgenin jáne onda barlyq yqtımal sharalar qamtylǵanyn jetkizdi. Onyń aıtýynsha, baıandamadaǵy birqatar baǵyttar Agroónerkásip keshenin damytý tujyrymdamasyna kirýi tıis edi. Memleket basshysy ulttyq joba túıindi máselelerdi sheshýge baǵyttalyp, qoldanysta qolaıly bolýy qajettigine toqtaldy. Jalpy alǵanda, Prezıdent agroónerkásip keshenin damytýdyń bazalyq tásilderin qoldady. Talqylaý qorytyndysy boıynsha Úkimetke jobany pysyqtaý tapsyryldy.

Memleket basshysy «jańadan» retteý tetikteri týraly baıandamaǵa qatysty pikir bildirip, elge qýatty, básekege qabiletti jeke bıznes kerek ekenin atap ótti. Ol ulttyq ekonomıkanyń jáne halyqtyń ál-aýqatyn arttyrýdyń negizi bolýǵa tıis.

– Zań jobasyna engiziletin normalar naqty jumys isteýi kerek. Reformalardyń máni men mańyzyn qashyratyn múddeler qaıshylyǵyna jol bermeý qajet, – dedi Qasym-Jomart Toqaev.

Prezıdent quqyqtyq reformalar týraly aıta kelip, ádil sot tóreligin qamtamasyz etý maqsatynda sot júıesin birtindep jáne júıeli jańǵyrtýdyń mańyzdylyǵyn atap ótti.

– Bul quqyqtyq memlekettiń asa mańyzdy kórsetkishi, ınvestısııalyq tartymdylyqtyń, jeke menshik quqyǵyn qorǵaýdy qamtamasyz etýdiń negizi. Sot júıesin reformalaýdyń jańa tásilderi sýdıalardyń táýelsizdigin odan ári nyǵaıtýǵa tıis. Reformalar qoǵamnyń sottarǵa senimin kúsheıtýi, sotqa jańa kásibı mamandardy tartýǵa yntalandyrýy, sot prosesteriniń tıimdiligi men qolaılylyǵyn arttyrýy qajet, – dedi Prezıdent.

Memleket basshysy ázirlengen tetikter sot salasyna quqyqtyń jekelegen baǵyttary boıynsha myqty zańgerler men mamandardy tartýǵa múmkindik beretinin aıtty.

Qasym-Jomart Toqaev bul másele Parlamentte azamattyq qoǵam ókilderi men zańgerlerdiń qatysýymen ashyq ári jan-jaqty talqylanýy kerek dep sanaıdy. Ol tıisti zań jobasyn bıyl qabyldaýdy tapsyrdy.

– Bul reforma óte mańyzdy. Ol Qazaqstannyń zamanaýı jáne tıimdi memleketke transformasııalanýyna baǵyttalǵan jumystardyń basyn biriktiredi, – dedi Prezıdent.

Qasym-Jomart Toqaev qylmystyq prosesti reformalaý týraly aıtyp, azamattardyń konstıtýsııalyq quqyqtaryn qorǵaýdy qamtamasyz etý jónindegi jumystyń basymdyǵyn atap ótti.

– Ol úshin prokýrorlar men advokattardyń sotta sóz jarys júrgizýine shynaıy jaǵdaı jasalýy, sot sheshimderine shaǵymdaný múmkindikteriniń keńeıtilýi, biryńǵaı sot praktıkasy qamtamasyz etilýi tıis. Sottyń qorytyndy úkimi proseske qatysýshylarǵa da, jalpy qoǵamǵa da túsinikti bolýy kerek, – dedi Memleket basshysy.

Qasym-Jomart Toqaev saıası, sot, ekonomıkalyq jáne áleýmettik salalardaǵy barlyq ózgeristerdi sheteldik áriptesterimizge saýatty jetkizý kerektigin aıtty. Atalǵan jumysty Halyqaralyq yntymaqtastyq jónindegi arnaıy ókil Erjan Qazyhanǵa úılestirýdi júktedi.

Sonymen qatar Memleket basshysy ınvestısııalyq daýlardy sheshý máselesin qozǵady. Osy rette Úkimetke bıylǵy jyldyń 1 tamyzyna deıin Ser Sýma Chakrabartıdiń baıandamasynda aıtylǵan máselelerdi jan-jaqty qarastyrýdy tapsyrdy. Bul jumysty úılestirý Prezıdent Ákimshiligine júkteldi.

Jıyn sońynda Qasym-Jomart Toqaev aldymyzda Qazaqstandy transformasııalaý jáne jańǵyrtý boıynsha aýqymdy jumystar turǵanyn aıtty.

– Bizge sapaly serpin kerek. Ol úshin bárińizdi júıeli jáne tıimdi jumys isteýge shaqyramyn, – dedi Memleket basshysy.

Sońǵy jańalyqtar

Araq satylmaıtyn aýdan

Aımaqtar • Keshe

Erlikke toly sýretter

Rýhanııat • Keshe

Uqsas jańalyqtar