25 sáýirde Eýropadaǵy qaýipsizdik jáne yntymaqtastyq uıymynyń Is basyndaǵy tóraǵasy, Qazaqstannyń Memlekettik hatshysy – Syrtqy ister mınıstri Qanat Saýdabaev Amerıka Qurama Shtattarynyń Memlekettik hatshysy Hılları Klıntonmen telefon arqyly sóılesti, dep bastady keshegi brıfıngi SIM-niń resmı ókili Asqar Abdrahmanov.
Áńgimelesýshiler ekijaqty qarym-qatynastyń keń aýqymdy máselelerin, sonyń ishinde aımaqtyq qaýipsizdik jáne Eýropadaǵy qaýipsizdik jáne yntymaqtastyq uıymynyń sheńberinde ózara yqpaldastyq máselelerin talqylady. Qanat Saýdabaev pen Hılları Klınton Qazaqstan Respýblıkasynyń Prezıdenti Nursultan Nazarbaev pen AQSh Prezıdenti Barak Obamanyń jaqynda Vashıngtonda ótken ekijaqty kezdesýiniń nátıjesi eki eldiń strategııalyq áriptestigine jańa serpilis bergenin jáne qol jetkizgen kelisimderdiń ýaqtyly jáne tolyǵymen júzege asýynyń mańyzdylyǵyn atap ótti. Sonymen qatar, taraptar álemdi ıadrolyq qaýipten saqtaýǵa mańyzdy úles qosqan ıadrolyq qaýipsizdik jónindegi Jahandyq sammıttiń halyqaralyq qoǵamdastyqtyń úlken jetistigine aınalǵanyn erekshe atady. Hılları Klınton Prezıdent Nursultan Nazarbaevtyń Eýropadaǵy qaýipsizdik jáne yntymaqtastyq uıymyna tóraǵa memlekettiń basshysy retinde Qyrǵyzstandaǵy jaǵdaıdy turaqtandyrýǵa qosqan zor úlesi úshin AQSh atynan alǵysyn bildirip, atalmysh Uıym sheńberinde Astana men Vashıngton aldaǵy ýaqytta da qyrǵyz elin saıası daǵdarystan shyǵarýda, qoǵamda turaqtylyq ornatý men konstıtýsııalyq damýyn qamtamasyz etýde tyǵyz baılanysta bolýǵa qyzyǵýshylyǵyn tanytty. Sondaı-aq, eki eldiń syrtqy saıası vedomstvolarynyń basshylary Almatyda ústimizdegi jyldyń 16 jáne 17 shildesi aralyǵynda ótetin Eýropadaǵy qaýipsizdik jáne yntymaqtastyq uıymyna múshe memleketter Syrtqy ister mınıstrleriniń beıresmı keńesi týraly jáne josparlanyp otyrǵan Uıym Sammıtiniń kún tártibiniń mazmunyn anyqtaý jóninde pikir almasty. 27 jáne 28 sáýirde, dep jalǵady sózin resmı ókil, NATO Bas hatshysynyń Ortalyq Azııa men Kavkaz boıynsha Arnaıy ókili Robert Sımmonstyń Qazaqstanǵa jumys sapary bolady. Sapar baǵdarlamasyna sáıkes Robert Sımmons birqatar memlekettik organdardyń basshylyǵymen kezdesýler ótkizip, Qazaqstannyń Qorǵanys mınıstrligi janyndaǵy Áskerı ınstıtýttyń “Beıbitshilik úshin seriktestik” oqý ortalyǵy jumysymen tanysady jáne Eýrazııalyq medıa forýmǵa qatysady. 29 sáýir men 1 mamyr aralyǵynda, dedi qorytyndysynda resmı ókil, Qazaqstannyń Premer-Mınıstri Kárim Másimovtiń Shanhaı qalasynda ótetin “EKSPO-2010” dúnıejúzilik kórmeniń resmı ashylý rásimine qatysýymen ushtastyrylǵan Qytaı Halyq Respýblıkasyna jumys sapary bolady. Úkimet basshysy sapar barysynda Qytaı Halyq Respýblıkasynyń saıası basshylyǵymen jáne Qazaqstanda jumys isteıtin iri qytaı kompanııalarynyń jetekshilerimen birqatar kezdesýler ótkizbek. Kelissózder barysynda eki memleket arasyndaǵy ekijaqty yqpaldastyqtyń kókeıkesti máseleleri jáne bolashaq yntymaqtastyq máseleleri talqylanady. “Egemen-aqparat”.
